Inuit Ataqatigiit siuttooqqilissagaluarput
Sermitsiap HS Analyse suleqatigalugu inunnik isumasiuisimanerata tamanna takutippaa, Sermitsiamilu aqagu saqqummertussami atuarneqarsinnaassalluni.
Atassut kinguarialaassagaluarpoq, Inatsisartunili ilaasortaatitani marluk tigummiinnassagaluarlugit. Atassut ukioq manna marsimi qinersisoqarmat 8,3 procentinit taaguunneqarsimaraiarluni maanna 7,3 procentinit taaguunneqassagaluarpoq, tassa 1 procentpointimik kinguarialaassagaluarluni.
Demokraatit 0,9 procentpointinik siuarialaassagaluarput, ilaasortaatitatillu marluk tigummiinnassagaluarlugit.
Inuit Ataqatigiit illuatungiliuttutut inissisimanertik atorluarsimagunarpaat, ullumikkummi qinersisoqartuugaluarpat 7,1 procentpointinik siuariassagaluarput, 42,2 procentinit taaguunneqassagaluarlutik. Ilaasortaatitaat pingasunik ilassagaluarput, marsimilu qinersisoqarmat Inuit Ataqatigiinnik taasisimasutut nalunaaruteqartut tamangajammik Inuit Ataqatigiinnik taaseqqikkumanertik isumasiuinermi oqaatigaat, taasinerillu nutaat pingaartumik Siumumik upernaaq taasisunit pisuussagaluarlutik, aviisi Sermitsiaq taama allappoq.
Partii Siumut 3,1 procentpointinik kinguariassagaluarpoq, ilaasortaatitaallu ataatsimik ikilisimassagaluarlutik. Suliassat amerlasuut inunnut tunngassuteqartut naalakkersuisoqatigiillu iluanni ajornartorsiutit ilaatigut pissutaallutik Siumut qinersisartunik annaasaqassagaluarpoq. HS Analyse taama naliliivoq.
Qinersisartut Siumumik qimatsisut tamarluinnangajammik Inuit Ataqatigiinnut nuussimapput, Partii Inunneersullu arlalissuullutik, Sermitsiaq allappoq.
Inatsisartunullu ullumikkut qinersisoqartuugaluarpat Partii Inuit ilaasortaatitaqarunnaassagaluarpoq, qinersisartummi marsimi qinersisoqarmat Partii Inunnut taasisut affaannanngussagaluarmata, Inatsisartunilu ilaasortaatitaqarunnaassagaluarlutik.
Qinersisartulli 26 procentiisa partiimik sorlermik qinersiniarnertik nalornissutigimmassuk, kisitsisit tutsuiginassusaat apeqquserneqarsinnaavoq, taakkuuppullu qinersisoqassagaluarpat qinersinerup inerneranik aalajangiisuusussat.
Inuit katillugit 715-it misissuinermi peqataapput, inuit 18-it sinnerlugit ukiullit makitsinikkut pissarsiarineqarsimallutik. Misissuineq arnaaneq angutaanerluunniit, najugaqarfik, ukiullu eqqarsaatigalugit innuttaasut katitigaaneranut naapertuuttoq, Sermitsiaq allappoq.