Inuit Ataqatigiit Siumut qinersereenerup kingorna suleqatigisinnaajunnaarpaa

Inuit Ataqatigiit tusagassiutinut aatsaarluinnaq nalunaarutigaat qinersereernerup kingorna Siumumik suleqateqarsinnaaneq pisinnaanngilluinnartoq.

Inuit Ataqatigiit siulittaasuat Josef Motzfeldt ippassaq Nuummi qinersisartunut ataatsimiititsineq kingulleq naammasereermat oqaaseqarpoq, Siumup naalakkersuisut siulittaasussaattut ikinnerpaamik marlunnik inuttassaqarlutik qineqqusaarnera qinersisartunut mitallernerusoq.

Partiit sinnerinut siuttuinullu tamanut tunngaveqanngitsumik mamarliineq pasilliutillu atorlugit, naggasiutiminni allat akinissamut periarfissaarutereersut saassutarinninnerat allanit tamanit qulliunerusutut kukkusimanngisaannartutullu nittarsaanniarnerat naalakkersuinikkut inuiaqatigiinnut siuttuunissamut imminut atorneqarsinnaajunnaarnermut ersiutaavoq.

Naggasiinermi Lars-Emil Johansenip oqaatsit atugai ataqqinassusiaasut, Inatsisartut oqaluttarfianni atorneqarpata pinngitsooratik nipangersinneqartussat atoramigit.

Inuit Ataqatigiit akuerisinnaanngilluinnarpaat oqallinneq inoqatinut akerartuinertalik politikkikkullu qunutitsiniarneq atorlugit Lars-Emil Johansenip ileqqulersornera. Oqqakkut ajussuseq sakkugalugu qinersisartunik nikassaaneq ippassaq Siumup takutitaa inuiaqatigiit atorfissaqartinngilaat.

Tamannaannarluunniit toqqammavigalugu Inuit Ataqatigiit paasivaat Siumut qinersereernerup kingorna suleqatissatut piukkunnarunnaavissimasoq, taamma naggasiivoq manna tikillugu partii naalakkersuisoqatigisimasaata siulittaasua Josef Motzfeldt, Inuit Ataqatigiit.