Inuit Ataqatigiit sinnerlugit qinigassanngortittoq sassarpoq

Taakku ilagaat IAmiit Sofia Rossen, taanna ilisimaneqartutut Julianne Henningsenip erninerminut atatillugu sulinngiffeqarnerani Inuit Ataqatigiit sinnerlugit taartaasimavoq.

- Qinigassanngortinnera suli Inuit Ataqatigiit siulersuisuuneraninngaanniit akuerineqarnikuunngilaq, kisianni  qaammat naatinnagu tusarliunneqarnissaa naatsorsuutigaara. Inuit Ataqatigiit Nuummiit kaammattorneqarnikuuvunga qinigassanngorteqqullunga, aamma inuinnarninngaanniit, arlaqaramik kaammattuisut, Sofia Rossen oqarpoq.

Tusatsiakkat naapertorlugit IA-miit qinigassanngortittup aappaa tassaavoq Inatsisartuni ilaasortaasimasoq partiillu siulittaasorisimasaa Johan Lund Olsen. Tamannali inuttaata suli uppernarsarusunngilaa.

Sofia Rossenilli neriuutigaa nammineq qinigassanngorteqatinilu partiimiit qinerneqarsinnaassallutik, taamaasillutik folketinngimi issiavissat marlut IA-miit tiguneqarsinnaaniassammata.

- Oqarusussagaluarpunga issiaviit tamaasa tigorusussinnaassagaluarivut, oqarsinnaanngilanga unammillerniarlugu arlaat qineqqusaarniarlunga, pissutigalugu suleqatigiinnissaq tassani orniginartussaagami, taavalu aamma inuiaqatigiinnut suliassavut ataasiusussaagamik, tassa nunatsinnut sullissisussaagatta, Sofia Rossen taama oqarpoq.

Atassutip qinigassanngortittussat suli oqaatigineqanngillat, siulittaasulli Gerhardt Petersennip oqaluttuarisinnaavaa partiimiit inuit sisamat sassartinneqassammata.

- Tassa siulersuisuunerit aalajangiutereerpaat inuit sisamat qinigassanngortinniarlugit, takkunanngalu angutit pingasut arnarlu ataaseq qinigassanngortinnikuupput. Sapinngisamik siulersuisuunerit agguataarsimavaat avannaaniit qeqqaniit kiisalu kujataaniit qinigassanngortitsisoqassasoq, Gerhardt Petersen oqarpoq. Taassuma ilanngullugu oqaatigaa qinigassanngortittut nutaartaqarlutillu  politikkikkut misilittagaqarluartunik ilaqassasut.

Siumut sisamanik qinigassanngortitaqarniarluni siusinnerusukkut nalunaaruteqarnikuuvoq, tassaasunik Doris Jakobsen, NIck Nielsen, Akitsinnguaq Olsen aamma Vittus Qujaukitsoq.

Demokraatit oqaatigisinnaanngilaat kikkut qinigassanngortissanerlugit, qinersinissarlu suaarutigineqareerpat nalunaarutigineqassasut oqaatigaat.