Inuit Ataqatigiit qinigassanngortitaat piareerput
Inuit Ataqatigiit nuna tamakkerlugu peqataaffigineqartumik Nuummi ataatsimeersuarneranni, Folketingimut qinigassanngortinniakkatik tallimaasut kikkuuneri saqqummiuppaat. Taakkulu KNR-ip siusinnerusukkut eqqoriaaneranit allaanerussuteqanngillat.
Qinigassanngortinneqartullu ukuupput:
Sofia Rossen, Folketingimi sulinermik misilittagaqareersoq, tassami taanna Juliane Henningsenimut, maanna qinigassanngorteqqinnianngitsumut sinniisussatut Folketingimi ilaasortaareerpoq.
IA-mi aamma Inatsisartuni siornatigut siulittaasuusoq Johan Lund Olsen Folketingimi ilaasortanngorniarluni qineqqusaarnissaminut aamma piareerpoq. Aamma taamatut piareerpoq, biologi Nikoline Ziemer, Danmarkimi SF-i sinnerlugu Folketingimut siornatigut qinigassanngortissimasoq aamma Sorlaat Partiiannik maanna unereersumik pilersitsisoq maannalu ilinniagartuut kattuffianni ASG-mi siulittaasuusoq.
Sara Olsvig Inuit Issittormiut Siunnersuisoqatigiiffianni inuit pisinnaatitaaffiinik suliaqartoq aamma IA sinnerlugu Folketingimut qinigassanngortippoq.
Qinigassanngortittunut aamma ilaavoq, Inatsisartuni sinniisutut sulinermik misilittagaqareersoq KIIIN-imi atuartitsinermi pisortaq Kaali Olsen, Juliane Henningsenimut sinniisutut Inatsisartuni upernaaq manna ilanngullugu ilaasortaasoq. Taamaalilluni IA-p maanna Folketingimi Inatsisartunilu ilaasortaatitaanut sinniisussatut misilittagaqareersut marluk qinigassanngortittunut ilaapput.
