Inuit Ataqatigiit qinersinissamut pilersaarutini partiini siullersaalluni naammassivai
Inuit Ataqatigiit Inatsisartuni partiini siullersaalluni qinersinissamut pilersaarutini naammassivai.
Inuit Ataqatigiit qinersinerup kingorna maannamut nutarterinerit nangeqqinniarpaat. Toqqaannartumik taaneqanngikkaluartoq, eqqarsaatigineqarunarpoq, assigiimmik akeqartitsineq, taannami IA-kkut taasinerat tunngavigalugu akuersissutigineqarmat.
-Siunissaq siooragiinnarlugu kingumut ingerlaniartoqassanngilaq, IA oqarpoq.
Kommunit aaqqissuussaanerat aamma IA-kunnit pingaartinneqarpoq.
Suleqatigiinnerunissaq pingaartinnerusariaqarpoq, kommunit kattussuunneqarnissaannut apeqqut kisiat pinnagu.
Kommunit sisamat kattunnissaannut siunnersuut IA-p eqqarsarnartoqartippaa, inuit ataasiakkaat sunniuteqarsinnaanerat eqqarsaatigalugu, aammalu innuttaasut sullilluarneqarnerunissaat eqqarsaatigalugu, Inuit Ataqatigiit isumaqarput.
IA-p erseqqissaatigaa, kommunit aaqqissuussaanerat pillugu oqallinnerup sukumiinerusumik ingerlanneqarnissaa suli pisariaqartoq.