Inuit Ataqatigiit qinersinerup inernera aalajangiisuutinniarpaat

Demokraatit siulittaasuat Per Berthelsen oqarpoq, qinersinerup kingorna naalakkersuisunngortitsiniarnermi Inuit

Ataqatigiit suleqatiginiarlugit, Inuit Ataqatigiilli siulittaasuata tullia Kuupik Kleist oqarpoq, marlunngorpat qinersinerup inernera qanoq pisoqaruumaarneranik aalajangiisuujumaartoq.

Sermitsiap HS analysimik misissuisitsinerani erserpoq, Demokraatit qinersisartuisa 60 procentiisaa kiisalu Inuit Ataqagigiit qinersartuisa 63 procentiisa kissaatigigaat, Demokraatit Inuit Ataqatigiillu qinersinerup kingorna naalakkersuisunngortitseqatigiinnissaat.

Demokraatit siulittaasuat Radioaviisimut oqarpoq, Inuit Ataqatigiillu suleqatigiinnissaq aqqutissatuatut isigalugu, kisiannili Inuit Ataqatigiinni siulittaasup tullia Kuupik Kleist oqarpoq, qinersinermi Inuit Ataqatigiit qanoq taaguunneqarnerat kiisalu kikkut inuiaqatigiinni aaqqiissuuseqqinnerni suleqatigisinaassaneritik apeqqutaalluinnartoq:

- Inuit Ataqatigiit marlunngorpat nukittulluta isissagutta piumasaqaativut sakkortunerusumik saqqummiussinnaassavagut. Nukittuallaarata isissagutta pissutsit allaassapput. Naalakkersuinikkut isumaqatigiissut tassaassooq inuiaqatigiinni aaqqiissuusseqqinnerit ingerlaqqinnissat, Kuupik Kleist oqarpoq.

Kuupik Kleist aamma oqarpoq misissuisitsinerup inerneri maluginiaritik, kisiannili Inuit Ataqatigiinni tusakkat tamaasa malersorneq ajoritik.

- Naalakkersuinikkut isumaavut aalajangiusimavagut, aamma qinersinerup kingorna taakku aalajangiisuussapput, Kuupik Kleist oqarpoq.