Inuit Ataqatigiit: Pisassanut naleqqussartuartariaqarpugut
- Isumaliutissiissut soqutiginartorpassuarnik imaqarpoq aamma qularnanngilaq, amerlanerpaat piviusunngortinneqarumaartut, Ane Hansen oqarpoq.
Taasuma pingaartippaa, aalisartut minnerpaamik ukioq ataaseq siumut pilersaarusiorsinnaasariaqartut. Eqqaamaqquaalu, aningaasarsiornikkut ajornartorsiortoqarnerani, kusanasaakkanik nioqqutissiat pisiarineqartartut ikilissasut, taamaammallu aalisakkanik raajanillu nunatsinniit tunisineq eqqorneqassasoq.
Nunarsuarmi unammillerneq eqqarsaatigalugu, aalisartut ikinnerulissasut inassutinut ilaavoq. Tamatumunngalu Ane Hansen ima oqarpoq:
- Kikkunnuungaluarnersoq aalisarsinnaanermut akuersissutinik tunioraasarneq nappanneqarsinnaanngilaq. Nunatta pissaqassusianut naleqqusartuannartariaqarpugut, taamaattumik aamma aalisartut ikilippata aalisartut aamma ikilisariaqassapput, Inatsisartunut ilaasortaq Inuit Ataqatigiinneersoq oqarpoq.
Kisianni aalisartut ikilippata aalisarunnaartut aatsitassarsiornermi sulilernissaannik isumaliut, taassuma isumaqatiginngilaa.
- Aamma nalunngilara, aalisartut siutaanni tusarniittorujussuusoq. Kisianni soorunami inuussutissarsiummut tassunga appakaattoqarusukkuni nalunngilaat. Takorloorneruara, inuussutissarsiut peqassutsimut naleqqussarnikkut ingerlanneqartuarumaarto, tamatumunnga inuttat aamma ilanngullugit. Kisianni aalisarneq inuussutissarsiutitut pingaaruteqartuaannarumaarpoq ukiorpassuarni tulliuttuni suli, Ane Hansen oqarpoq.
