Inuit Ataqatigiit Københavnimi immikkoortortaqalerpoq
Immikkoortortaqarfiup saaffigisai tassaallutik kalaallit Danmarkimi najugaqartut, kalaallit ilinniagaqartut allallu Kalaallit Nunaannik soqutiginnittut.
- Danmarkimi politikerit suliassaat uatsinnut tunngassuteqarsinnaasut qaangiataaginnarneqartartut sammineqarnerulernissaat, IA Københavnimimit neriuutigaarput, immikkoortortaqarfiup siulittaasortaava, Ortu Mørch Olsen oqarpoq.
- Ataatsimut isigalugu inuiaqatigiit ineriartortinneqarneranni, inunnut inooqatigiinnermullu tunngasut pingaartinnerunissaat kissaatigaarput, tassami uagut kalaallit Nunatta isumalluutaani pingaarnersaavugut, immikkoortortap siulittaasua oqarpoq.
Immikkoortortamik pilersitsilluni ataatsimiinneq arfininngormat juunip aallaqqaataani Københavnimi pivoq, katillugillu 21-t ataatsimeeqataallutik.
Nalinginnaasumik ukiumoortumik ataatsimeersuarnissaq siulleq aggustimi pisussatut pilersaarutaavoq, taamaalilluni immikkoortortaqarfittaap malittarisassai siunertaalu oqallisigineqarniassammata aalajangiunneqarlutillu.
