Inuit Ataqatigiit Demokraatit isornartorsioraat
Demokraatilli Inuit Ataqatigit isornartorsiuinerat akissuteqarfigaat.
Naalakkersuisoqatigiinni ilaasortaanngikkaluarluni naalakkersuinikkut suleqatigiittoqarsinnaasoq, politikkimut akisussaalluni Demokraatini siuilttaasumut tullersorti Randi Vestergaard Evaldsen oqarpoq.
- Tapertaalluta issiagaluarluta politikkikkut suleqatigiilluarnikkut eqqartuinikkullu aamma takutippaa suleqatigiilluarsinnaaneq qanoq isikkoqarsinnaanersoq. Tassuunatigullu aamma inuiaqatigiinnt pitsaanerpaamik anguniagaqaqatigiilluta sunniuteqaqatigiippugut, Randi Vestergaard Evaldsen taama oqarpoq.
AAMMA ATUARUK Sooq taava Demokraatit naalakkersuisooqataanissaq naaggaarpaat?
Inuit Ataqatigiit siulittaasuata tulliata Aqqaluaq B. Egedep tamanna apeqquserpaa:
- Demokraatit periarfissaqarsimapput Naalakkersuisoqarfinnik tigusillutik sulianik ilusilersueqataanissaminnut. Akisussaaffilli annertooq qunugisutut illugu patsisilersuutigaat Siumup iluani ilumini ilungersunartorsiornera pissutigalugu Naalakkersuisooqataarusunnatik, Aqqaluaq B. Egede arfininngormat januaarip ulluisa tallimaanni ilaatigut oqarpoq.
Isornartorsiunerli tamanna Randi Vestergaard Evaldsenimit ilumuunnginnerarneqarpoq:
- Demokraatini taamani nalilerparput, nunatsinnut pitsaanavianngitsoq Inatsisartunut qinerseqqissagaluarutta. Tamaattumik naalakkersuisoqatigiit isumaqatigiissuteqarfigaagut amerlanerussusiisarniarluta. Taamaalioratta soorunami politikkimut ingerlanneqartumut sunniuteqarluarnissarput piumasaarput, Randi Vestergaard Evaldsen oqarpoq, nangillunilu:
- Isumaqarpunga ajornanngippallaarujussuartoq taamannak pisuutitsiniassalluni akisussaaffimmik tigusinnginnerarluta. Isumaqarpunga suleqatigiinneq partiit tamat akimorlugit suliassaasoq. Taamaattumik una suleriuseq atorneqartoq ullutsinut naleqquttuusoq, politikkimut akisussaalluni Demokraatini siuilttaasumut tullersorti Randi Vestergaard Evaldsen taama oqarpoq.
AAMMA ATUARUK Ataatsimiinneq iluatsilluarpoq