Inuit Ataqatigiit Atassullu ukiut nikinneranni oqaaseqarput

Partiit naalakkersuisooqataasut Inuit Ataqatigiit Atassutillu siulittaasui Josef Motzfeldt aamma Finn Karlsen ukiut nikinneranni oqaaseqarput.

Inuit Ataqatigiit siulittaasuata Josef Motzfeldtip oqaaseqarnermini uumassusilinnik atuinerput aallaqqaatigaa.

-Ukiumi qaangiuttumi uumassusilinnik atuinerput tamatigut tunngavilersuutit naammaginartuaannanngitsut atorlugit annertuumik sammineqarpoq. Tamatuma uitsataanera tupinnartoqanngilaq, paaseqatigiissutigiumalluguli samminerusariaqarparput, nalileeriaatsit marluk, tassalu misigissutsit aamma nalunaarsuinerit ilinniarfinni ilisimatusarsimasat, tunngavigalugit isummeriaatsit naapitsinniarnissaat, Josef Motzfeldt allappoq.

KNAPK-p biologillu assigiinngitsunik aallaaveqarlutik akerleriinnik isummertarnerat soorunami eqqumiigineqarsinnaanngilaq, tamarmilli inuiaqatigiinnut pisussaaffigaat isummaminnik naapitsitsiniaanissartik, Josef Motzfeldt nangilluni allappoq. Qinikkat isummanik naapitsitsiniaanissamut minnerunngitsumillu siunissami aalajangersaasarnissat eqqarsaatigalugit pisussaaffeqarnerat erseqqissaatigaa.

Atassutip siulittaasuata Finn Karlsenip oqaseqarnermini uumassusilinnik atuinerput aamma tikippaa, tassani piniartut aalisartut ilisimatuullu pinngortitalerninermik suliaqartut ilisimasaasa imminnut naapertuuttuunissaat aamma pingaartillugu eqqaavaa.

-Pisuussutit qanoq iluaqutiginerpaasinnaanerlutigit, uungaaraannaanngitsoq, siunissarli ungasinnerusoq ilanngullugu pilersaarusiorsinnaasariaqarpugut. Atassumit pingaartilluinnarparput pisassiisoqarnissaanik aalajangiiniarnerni toqqammavissiuusseqataasartut aalisartut piniartut pinngortitalerniermillu suliaqartut ilisimasaasa imminnut naapertuuttuunissaat, Finn Karlsen allappoq.

Erseqqissaatigaa uumassusillit pillugit ilisimasat anertusarneqarnissaannut nukissat aningaasallu naammattut pigineqarnissaat pingaartuusoq.