Inuit Ataqatigiinneersoq: Kræftimik akiuiniarnermi pitsaaliuinermik suliaqarnissaq pingaarpoq
Inuit Ataqatigiit kræftimik akiuiniarnermi pitsaaliuinermik suliaqarnissaq pingaartippaat.
- Nunatta nakorsaanerata oqarsimaneratut, kræfteqalersut 50 procentii tassaapput pinaveersaarneqarsinnaasut. Taamaammat pinaveersaartitsineq annertooq pisariaqarpoq, Inuit Ataqatigiit sinnerlugit Inatsisartuni ilaasortaq, Peqqinnissarlu pillugu oqaaseqartartoq, Agathe Fontain oqarpoq.
- Peqqinnerusumik inuuneqarnissamik paasititsiniaanerit annertunerpaaffimminniittuarnissaat qulakkeerniartariaqarparput. Innuttaasut nakorsamik misissorluarneqartarnissaat pitsanngorsartariaqartuarparput. Qanoq nappaatigisamik imminut misissorsinnaanerit ilisimatitsissutigiuartariaqarpagut, Agathe Fontain tusagassiutinut allappoq.
- Katsorsartinnerli imaannaanngitsorsuummat inuunermut nalinginnaasumut ikiorneqarnissaq pisariaqartarpoq. Taamaammat napparsimanermi, ajorunnaarnermilu ikiorsiissutit eqqumaffigineqartariaqarput. Soorlu sungiusarneqarnerit, killilimmik sulisinnaanerit, immaqaluunniit angerlarsimaffimmi ikiorteqarsinnaanerit periarfissaasariaqarput, Agathe Fontain, nunarsuaq tamakkerlugu kræftemik akiuiniarnerup ulluanut atatillugu, ilaatigut taama allappoq.