Inuit Ataqatigiinneersoq: Inuusat atorlugit sungiusartitsisarneq unitsinneqalerpa?

Inuusat atorlugit sungiusaaneq 2011-miilli ingerlanneqalerpoq, 2013-imilu naliliinerup takutippaa, suliniutikkut kissaatiginngisamik naartuersittarnerit malunnaatilimmik ikileriarsimasut, Inuit Ataqatigiinneersoq Naalakkersuisunut § 37 naapertorlugu apeqquteqaatimini taama allappoq.

Inuusat atorlugit suliniummi "inuusat real care"-mik taaneqartut arlallit atorneqarput, naalungiarsuttut pissuseqarlutik unnuakkut itertarput, nerisinneqarlutillu nangii taarsigassaasarlutik. Inuusuttuaqqat inuusat ulluni marlunni-pingasuni paaqqutarisarpaat meerartaajaartarnerullu sunik nassataqarneranik paasisaqarfigisarlugu. Suliniutip siunertaraa kissaatiginngisamik naartulertarnerit ikilisinnissaat, aammalu inuusuttut namminneq aalajangermikkut aatsaat naartulerusukkunik taamatut aalajangiinissaannut periarfissinnissaat.

Taarsiullugu sunik pilersaaruteqartoqarpa?

Suliniutip unitsinniarneqarnera Aaja Chemnitz Larsenip Naalakkersuisunut uppernarsaqquaa, aammalu inuusut real-caremik taaneqartartut akisuupilussuit atorunnaarnissaat qanoq akeqassanersoq apeqqutigalugu. Aamma pinaveersaartitsinermik suliniummut pineqartumut taarsiullugu Naalakkersuisut sunik pilersaaruteqarnersut paaserusuppaa.

Tunngavilersuutiminilu inuusuttuaqqat 46 %-iisa misileereernerup kingorna ilimagineqartumit aatsaat kingusinnerusukkut angajoqqaanngornissartik aalajangiuttaraat, aammalu misiliinerup kinguneranik naartunaveersaatit atorneqarnerat, inuusuttut namminneq oqaatigisaat naapertorlugit, malunnaatilimmik qaffariarsimasoq erseqqissaatigaa.

Inuit Ataqatigiinnersup apeqqutimi ullut suliffiusut qulit qaangiutsinnagit akissuteqarfiginissaat kissaatigaa.