Inuit akornanni paarlaasseqatigiitalernissaq taperserpaat

Nunatsinni inuusuttut paarlaasseqatigiinnikkut naggueqatitsinnut kimmut nuukkallarsinnaalernissaannik periarfissiinissaq inatsisartuni ippassaq oqallisigineqarmat, partiit amerlanerussuteqartut tapersiipput.
Allattoq Jens Thorin
marsip 03-at 2011 08:03

Nunatsinni inuusuttut ilinnialernissamut piareersimanngitsut, ilinniakkamik suli aallartitsinngitsut, imaluunnniit angalarusuttut, Nunavummut Nunavimmulluunniit aallarsinnaasariaqartut, IA-meersut Juliane Henningsen Jane Petersenilu isumaqarput.

- Praktikkernissamut aamma sulinermut misilittagaqarnissamut atorneqarsinnaavoq, minnerunngitsumik kulturikkut, eqqumiitsuliornikkut allatigullu paarlaasseqatigiiffiusinnaalluni, Jane Petersen oqarpoq.

Siunnersuutaat "Nuna Job" paarlaateqatigiittarnermik siunertaqarpoq. Tassalu Nunatsinni inuusuttut kimmut nuukkallarsinnaalissapput, aammalu Nunavummi Nunavimmilu inuusuttut Nunatsinnut nuukkallarsinnalerlutik.

Taanna Nunani Avannarlerni atuutereertumut "Nord Job"-imut assingussaaq.

Siunnersuut Inatsisartuni tapersersorneqarpoq, Siumulli kisimi tunuarsimaarpoq, qanoq aningaasalersorneqarnissaa ilaatigut ersarlummat.

Kisianni Nunanut Avannarlernut tunngasunut naalakkersuisup, Palle Christiansenip, oqallinnermi eqqaavaa, Nunat Avannarliit akornanni allanik peqataasoqarpat, aningaasat nassaarineqarsinnaasut.

Siunnersuut ukiaru aappassaaneerneqassaaq. Aningaasalersuinissamut tunngasut Naalakkersuisut taamanikkussamut misissussavaat.

Siunnersuut Inatsisartut ataatsimiititaliaasa marluk aamma misissussavaat.