Inuit Afrikamiittut
Naggueqatitta inuusuttaat sisamat Nain-imiit allallu sisamat Hopedale-miit, tassa Nunatsiavummi illoqarfiit pingaarnersaanneersut inuunerminni pissanganartumik angalanialerput.
Allattoq Hagen Højer Christensen
Afrikamiittumut Tanzaniamut februaarimi angalanissaminnut toqqarneqarsimapput.
Angalaneq katillugu sapaatip-akunnerinik arfineq-marlunnik sivisussuseqassaaq. Inuusuttut allat nunap inoqqaavineersut Canadami piffinni assigiinngitsuneersut peqatigalugit Tanzaniami piujuartitsisinnaasunik naatsiiviliussapput.
Angalatitsinerup siunertaraa inuit indianerillu inuusuttaasa siunissami aqutsisuusussatut ineriartortinnissaat. Nunami allamiinnerminni inuusuttut afrikameersut kulturimi allaanerusumi suleqatiginissaat ilinniassavaat.
Angalaneq Canadami naalakkersuisut inuusuttunut nunarsuarmioqatinut suliniutaannit aningaasalesorneqassaaq.