Inuit aamma silap pissusaata allanngoriartornera pillugu atuakkiaq nutaaq

Sheila Watt Cloutierip Atuakkiani atsersimavaa 'The Right to be Cold' ("Nillungajuaannarsinnaatitaaneq") imaraalu nammineq inuunerata oqaluttuassartaa, Nunavimmilu ukiuni kingullerni 40-ni allanngoriaaterpassuit kisissaanngitsut pisimasut sammisimavai. Sheila Watt Cloutiers-ip atuakkiaa Nunavimmiup qaqutigoortumik atuakkiaraa, Nunavimmimi soorlu Kalaallit Nunaannut naleqqiullugu atuakkiatigut kultureqanngillat.

Sheila Watt Cloutier ilaatigut ICC-mi præsidentiusimavoq, kisianni nunamini nunarsuarmilu tamarmi Issittumi avatangiisinut, klimap allanngoriartorneranut Issittumullu tamarmut suliniutini tusaamasaassutigineruai. Taama suliniuteqarnerminut Nobelip eqqissinissaq pillugu nersornaasiuttagaanut, USA-mi præsidentip tullersortigisimasaa Al Gore peqatigalugu innersuunneqarsimavoq.

Ukiorparujussuarni avatangiisit minguitsut sorsuutigisimavai, aammali naggueqatigiit Inuit pisinnaatitaaffii, soorlu Radioaviisimut ima oqartoq:

- Aperineqakkajuttarpunga klimap allanngoriartorneranut avatangiisinullu sooq taamarsuaq piffissara atortarneriga, taama Nunavimmi Issittumilu allani inuuniarnikkut ajornartorsiuteqartoqartigisoq.

- Radioaviisimut nangilluni oqaluttuarpoq, ajornartorsiutit taakku imminnut atalluinnartut, immammi sikua aappat uumasullu allanut nutserlutik, taava naggueqatigiit Inuit inuusaasiat ingerlatiinnarsinnaanngilarput, inuuniarnikkullu ajornartorsiutit ingerlaannassapput.

"Nillungajuaannarsinnaatitaaneq" atuakkiortuata imatut paasitikkusuppaa: sikulimmi aputilimmilu Inuttut najugaqarlunilu inuusinnaatitaaneq inuttut pisinnaatitaaffiusoq.