Filippinerini nunaqarfeeqqat ilaanni Guinsaugon-imi, sapaatit-akunneri arlallit sialussuaaqattaarnerata kingunerisaanik sisamanngormat nuna sisooreersorlu, maannamut inuit 68-it toqungasut timaat nanineqareerput. Nunaqarfimmi innuttaasut 941-ut suli tammaaneqarput.
Guinsaugon-imi Filippiineriniittumi nuna sisummat, illut amerlanersaat maqullummik 10 meeterisut portutigisumik matoorneqarsimapput, timillu nanineqartartut toqungasarmata, allanik annattoqarsimanissaa ilimananngitsoq, qeqertami Leyte-mi, nunaqarfiup Guinsaugon-ip guvernøria, Rosette Lerias oqarpoq.
Aamma illoqarfimmi Zambora-mi unnuaq nuna sisuvoq, tassanilu inuit tallimat, inersimasut marluk meeqqallu pingasut ajunaarsimasut nalunaarutigineqarpoq.
Illoqarfimmi allami nunap sisoornissaa ernummatigineqalermat, inuit qimarnunneqalersut aamma Politiken-imit allaaserineqarpoq.