Inuit 8000-t kredsrettini pineqaatissinneqarnissartik utaqqivaat
Taakku ataatsimiimmata nunatsinni kredsretttini suliassarpassuit pingaarnertut oqaluuserineqarput. Eqqartuussivinnimi suliassat 8000-init ikinnerunngitsut suli inerniliiffigineqarsimanngimmata.
- Suliassat qaleriaatiinnalersimammata Danmarkimi Inatsisinik atuutsitsinermik ministeriaqarfik suliassarpassuit ikilisarniarlugit suliriusissamut pilersaarusiornissaat noqqaassutigaara, Martha Lund Olsen oqarpoq.
Aamma Nunatsinni Eqqartussiveqarnermut siunnersuisoqatigiit aggustip 15-iani 16-ianilu Tasiilami ataatsimiippata pissutsit taakkorpiaat eqqartorneqassapput. Ataatsimiinnermilu tassani eqqartuussivinni suliassat qaleriiaatiinnalersimasut qanoq iliorluni ikilisarneqarsinnaanerisa siunnersuusiorneqarnissaat Inatsisinik atuutsitsinermut naalakkersuisup naatsorsuutiginerarlugu.
Naalakkersuisoq ministerilu ataatsimiimmata assigiinngitsunik tallimanik eqqartueqatigiipput. Tassa pinerlittaaliuineq, pinerlittaalititsinermullu suliniutit suuneri, aaqqiagiinngissutit pillugit Nunatsinni siunnersuisoqatigiiliortoqarnissaa, kredsrettit killiffii, pineqaatissinneqarsimasunut katsorsaanermi neqeroorutaasalersussat sumut killinneri, kiisalu pinerlittaaliuinermut inatsisip nutarsarneqarnissaanut pilersaarutip sumut killinnera oqaluuserineqarsimallutik.
Ataatsimeeqatigiinnerullu nalaani Sisimiuni Politiit misiliutigalugu suliniutaat aamma oqaluuserineqartoq Martha Lund Olsenip oqaatigaa.
Suliniut ”Angerlarsimaffimmi eqqissiviilliorani oqaloqatigiinneq”-mik qulequtserneqarsimasumi angerlarsimaffimmi eqqissiviilliornerup aqaguani Sisimiuni politiit ornigullutik pisoq pillugu oqaloqatigiinnittalersimaneri misiliutigineqarpoq.
- Periuserlumi taanna pinerlittaaliuinermut atatillugu iluatsilluarsimavoq. Taamaamma periutsip taassuma illoqarfiit sinnerini atuutsinneqalersinnaanissaa oqaloqatigiissutigivarput, ataatsimiinnittalu ulluani siullermi sumiiffinni inunnik isumaginnittoqarfiit suliamut taputartuuttalerneqarnissaat suliallu taamaasilluni ingerlateqqinneqarsinnaasunngortinneqarnissaa isumaqitiissutigisinnaasimallutigu.
