InuiSap ataatsimiisitsinera soqutigineqarluarpoq

Suliniaqatigiiffimmik pilersitsiniarneq ajornakusoorsinnaasarpoq – pingaartumik oqallittarfiunerussappat. Nunatsinni Inuiaqatigiilerinermik Sammisallit Suleqatigiiffiat InuiSa aallartinniarlugu ippassaq ataatsimiititsisoqarmat – malittarisassat annerusumik oqallisigineqarnerat pissutigalugu peqatigiiffiup aallartinnissaa sapaatip-akunnerinik sisamanik kinguartinneqarpoq. Tungaanut malittarisassat qanoq imaqarnissaat suleqatigiissitaliap piareersassavai.

Inuiaqatigiilerinermik Sammisallit oqallittarfiat inuiaqatigiinni pisunik – politikerit peqataatillugit – eqqartoqatigiiffiusassaaq. Pilersinniagaq inatsisartuni ilaqutariinnermut ataatsimiititaliami siulittaasup Agathe Fontainip assut iluatinnartippaa.

-Tassa inuiaqatigiilerinermi suleqatigiiffik taamatut pilersinneqassappat iluaqutaasorujussuussaaq, qinikkanut oqallinermik annertunerusumik pilersitsisinnaappat ullumikkorninngarnit innuttaasut akornanni taanna isumaqarpunga pitsaasuusoq. Agathe Fontain oqarpoq.

InuiSa-p ippassaq ataatsimiinnerani inuit 100-t peqataaffigisaanni meeqqat inuusuttullu kinguaassiutitigut atornerlunneqartarnerat aamma oqaluuserineqarpoq.

InuiSa pilersitsiviusumik ataatsimeersuassaaq maajip 23-ani.