InuiSa-mi siulersuisut inissitsiterput
Inuiaqatigiilerinermik sammisallit suleqatigiiffiat – InuiSa - pilersinneqarnereersorlu siulersuisuni inissitsitertoqarpoq.
Siulersuisut ataatsimeeqqaarnerminni 25. maj 2006-imi siulittasussamittut toqqarpaat Markus E. Olsen, allatsinngorpoq Benedikte Thorsteinsson.
Aningaaserisoq - siulersuisuni ilaasortat marluk peqquteqartumik peqataasinnaannginnerat pissutigalugu - kingusinnerusukkut toqqarneqassaaq.
Inuiaqatigiilerinermik sammisallit suleqatigiiffiata, InuiSa-p, ilaatigut siunertaraa inuiaqatigiinni tamanut ammasumik oqallitsitsisarnissaq, qaammarsaanermut ikiuutaasarnissaq aamma Kalaallit Nunaannilu inuinnaat ilisimatusarfissaannut (folkeuniversitet) tunngaviliiniassalluni.
InuiSa-p siulersuisisa sulinissaminni suliniutissat tulleriiarlugit ingerlatissavaat ukiamullu oqallitsitsinerit siulliit aallartinneqassapput.
Kikkulluunniit ilaasortanngorsinnaapput tamannalu nittartagaq www.inuisa.org aqqutigalugu pisinnaavoq.
