Nuummi ullaakkut nalunaaqutaq 8.00 puiseqqaanniuttoqassaaq.Assi: KNR

Inuiattut ullorsiornitsinni pisussat ilaat

Ullumi inuiattut ullorsiornitsinni sineriammi pisussat amerlapput.

Ullumi inuiattut ullorsiorpugut, tamannalu nunatsinni soorunami nalliussissavarput. Nuummilu ullaakkut nal. 7.40 aallartittumik nalliussineqarnera KNR-TV-kkut aamma KNR Radiokkut malinnaavigineqarsinnaavoq.

Namminersorlutik Oqartussat kulturilerisunut nersornaasiuttagaat kultureqarnermut naalakkersuisumit nalunaaqutaq 10.50 tunniunneqassaaq. Tamanna KNR TV-kkut aamma KNR Radiokkut malinnaavigineqarsinnaavoq.

Ullaakkut nalunaaqutaq 8:55 naalagiaqatigiinneq KNR Radiokkut tusarnaarneqarsinnaavoq. Aamma Illeq unnukkut nalunaaqutaq 19.00 aallakaatinneqassaaq, tassanilu inuiattut ullorsiornerput sammineqassaaq.

Kommune Kujallermi pisussat

Nunatsinni kommunini tallimani aamma pisussarpassuaqarpoq.

Qaqortumi tissaluttualiap eqqaani katerisimaartoqarlunilu assigiinngitsunik takutitsisoqassaaq. Qaqortumi inuiattut ullorsiorneq Tarsersuaq kaajallallugu pisuttuartitsinermik nalunaaqutaq 11:00 aallarnerneqassaaq. Tae Kwon Do-rtartullu nalunaaqutaq 14:00 takutitsissapput, tamatumalu kingorna Qajaq Qaqortumeersut qaannamik takutitsissapput Arctic Sports Qaqortumeersullu inuit timersuutaannik takutitsissapput.

Nipilersoqatigiit Piitsukkut ualikkut nalunaaqutaq 16.30 tusarnaartitsillutik appissapput.

Ullullu nalliussinera timersortarfimmi unnukkut nalunaaqutaq 20:00-miit nalunaaqutaq 21.30- tungaanut nanginneqarpat, kulturikkut maligassiuisumut aamma nersornaasiisoqassaaq.

Puiseqqaanniuttussallu kalaalimineerniarfiup eqqaaniit nalunaaqutaq 11.00 aallassapput, puiseqqaanniuttunilu ajugaasoq, ajugaasup tullia ajugaasullu pingajuat Great Greenlandit akissarsiassaqarput.

Inuiattut ullorsiornitsinni Kujataani pisussat Kommune Kujalliup facebookiani takusinnaavatit. 

Kommuneqarfik Sermersuumi pisussat

Nuummi inuiattut ullorsiorneq pisarneq malillugu kommuneqarfiup allaffeqarfianiit Nuutoqqamut ingerlaaqatigiinnermik ullaakkut nalunaaqutaq 7.30 aallarnerneqassaaq, Nuummi peqatigiiffinneersuut tassani ingerlaaqatigiissallutik. Ullaakkut nalunaaqutaq 8:00 puiseqqaanniuttoqassaaq.

Borgmesterinngorlaaq Avaaraq Olsen borgmesteritut ullaakkut nalunaaqutaq 8.15 oqalugiarngaassaaq, erinarsoqatigiillu tamatumalu kingorna erinarsoreerpata Annaassisitta Oqaluffiani naalagiaqatigiittoqassaaq.

Puisillu amianik qapiarnermik Kittani, ulloq taanna ukiut 40-nngortorsiorluni nalliuttorsiortumi, nalunaaqutaq 9.50 unammisitsisoqassaaq. Kittat ullaakkut nalunaaqutaq 8.15 ammassaaq.

Tasiilami inuiattut ullorsiorneq ullaakkut nalunaaqutaq 8.00 qamutilittarnermik aallarnerneqassaaq. Nalunaaqutaq 9.00 naalagiaqatigiittoqassaaq. Ullup sinnerani pinnguaatinik nipilersornermillu aaqqissuussinerit Ittamiini nalunaaqutaq13.00 aallartissapput.  

Ittoqqortoormiini inuiattut ullorsiorneq erfalasuliinertalimmik oqalugiarnertalimmillu ullaakkut nalunaaqutaq 8.00 aallarnerneqariarluni nalunaaqutaq 9.00 naalagiaqatigiittoqassaaq. Kingorna nalunaaqutaq 11.00 puiseqqaanniuttoqassaaq.

Inuiattut ullorsiornitsinni Kommuneqarfik Sermersuumi pisussat uani takusinnaavatit.

Qeqqata Kommuniani pisussat

Maniitsumi inuiattut ullorsiorneq kommuneqarfiup allaffiata silataani erfalasulernertalimmik nalunaaqutaq 8.30 aallarnerneqassaaq, kingornalu Eliap Oqaluffiani nalunaaqutaq 9.00 naalagiaqatigiittoqassalluni. Maniitsumi peqatigiiffiit assigiinngitsut silami arsaattarfeeqqap eqqaani aaqqissuussaat assigiinngitsut nalunaaqutaq 12.00 aallartissapput.

Sisimiuni inuiattut ullorsiorneq puiseqqaanniunnertalimmik ullaakkut nalunaaqutaq 8.00 aallarnerneqassaaq. Kommuneqarfiullu allaffeqarfiata silataani nalunaaqutaq 9.15 qamutilittartoqarlunilu erfalasulertoqareerpat naalagiaqatigiittoqassaaq.

Inuiattut ullorsiornitsinni Qeqqata Kommuniani pisussat Qeqqata Kommuniata facebookiani takusinnaavatit.

Kommune Qeqertalimmi pisussat

Aasianni inuiattut ullorsiorneq kommuneqarfiup allaffiata silataani erfalasulernertalimmik erinarsoqatigiinnertalimmillu ullaakkut nalunaaqutaq 8.00 aallarnerneqassaaq kingornalu nalunaaqutaq 9.00 naalagiaqatigiittoqassalluni. Kingorna oqaluffiullu silataani nalunaaqutaq 10.00 nereqatigiittoqassaaq.

Aasianni timersoqatigiiffiup T-41-p aaqqissuussaanik nalunaaqutaq 12.00 isikkamik arsaattoqassaaq, qatserisartullu meeqqanut aamma sammisassaqartitsiumaarput. Iffiornermik aamma unammisitsisoqassaaq, tassanilu Mette Blomsterberg iffiukkanik naliliisartussalluni. Mette Blomsterbergip iffiornermik unammisitsinermik aallakaatitassiami ”Den Store Bagedyst”-imi naliliisartuunini ilisimaneqaatigaa. Qaqortumi iffiornermik siorna unammisitsisoqarmat aamma naliliisartuuvoq.

Qeqertarsuarmiut illoqarfiup qeqqani allagarsiiviup eqqaaniit kommuneqarfiup allaffeqarfianut ullaakkut nalunaaqutaq 7.45 ingerlaaqatigiissapput. Kommuneqarfiullu allaffeqarfiata silataani erinarsoqatigiittoqarlunilu oqalugiartoqassaaq.

Nalunaaqutaq 10.00 naalagiaqatigiittoqassaaq.

Katersugaasivik ualikkut ammassaaq, tassanilu saqqummersitat Qullissamut tunngasut takusarneqarsinnaassapput. Arsaattarfiullu eqqaani ualikkut nalunaaqutaq 13.00-miit nalunaaqutaq 16.00-p tungaanut aamma aliikkusersuisoqartassaaq.

Inuiattut ullorsiornitsinni Kommune Qeqertalimmi pisussat Kommune Qeqertaliup facebookiani takusinnaavatit.

Avannaata Kommuniani pisussat

Ilulissani inuiattut ullorsiorneq Zionip Oqaluffiata silataani ullaakkut erfalasulernertalimmik ullaakkorsioqatigiinnertalimmillu aallarnerneqassaaq. Nalunaaqutaq 10.00 puiseqqaanniuttoqareerpat qajartornermik takutitsisoqassaaq.

Kangiata Illorsuatalu akiani ualikkut nalunaaqutaq 13.30 aamma grillerisoqassaaq, tassanilu kulturikkut maligassiusumut ilaatigut aamma nersornaasiisoqassalluni.

Inuiattut ullorsiornitsinni Uummannami, Upernavimmi Qaanaamilu pisussat Avannaata Kommuniani facebookiani takusinnaavatit.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl