Inuiattut ullorsiorneq pisussarpassuaqarpoq

Tivarpalaaq, uaajeerneq, umiat qajartalerlutik puisimik kalittut, tunumiut tupiata eqqaani puisimik pilattut tamakkuupput aqagu inuiattut ullorsiulerutta Tasiilami misigineqarsinnaasorpassuit ilaannamineeranngui.

Soorluttaaq aamma ullup ingerlanerani kalattut arsaattoqartussaasoq, taamaattoqartillugulu inuppassuit ussattarput pissangaqalutillu nilliarrattaqalutik.

Taamatuttaaq qatserisartut qanoq annaassiniartoqartarneranik takutitsissapput nipilersortartullu assigiinngitsut appisimaartinneqartassallutik.

Kalaallit Nunaata ilaani silaannarsuarmi aamma nalliuttorsiorneq misigineqarsinnaavoq tassami Air Greenland ilaasuminut ulloq taanna ilaasunut kaagillerniarpoq. Kikkullu tamarmik timmisartumut ilaanngikkaluilluunniit aamma ullorsiorneq misigisinnaavaat tassami assilisanik unammisitsisoqartussaammat.

Nuummi pisussani pilersaarutit 42-nik ikinnerunngitsut pissapput ilaannaalu taassagutsigit eqqaasinnaavarput

Arpattoqartussaammat innartortoqarsinnaalluni aammalu imaani arsaattoqassasoq unnersiutigineqarpoq, katersortarfimmilugooq aamma Pavia Geisler appisimaassaaq.

Narsami sakkutuut angallataat ukiuni arlalinni Narsamiittoq atorunnaartussaavoq taamaammallu Narsarmiut angallammut tassunga takornariarsinnaapput, taamatuttaaq nipilersoriaatsimik rap-imik aallutallit appisimaartinneqassapput.

Sisimiuni kulturikkkut illorsuarmi Taseralimmi inuusuttuaqqanut naleqqussakkamik nutaaliorluni aaqqissuisoqarsimasoq oqaatigineqarpoq. Breakdancerlutik qitittartut Teenage dancers aamma Maniitsumeersut B-Boys breakdanserlutik unammiuaaqatigiissasut unnersiutigineqarpoq.

Kalaallit Nunaanni pisussarpassuit ilaannamininngui taamaalillugit tigulaariffigilaarpavut.