Inuiattut ullorsiorneq

Ullortunermi nalliuttorsiortarneq 1985-imi aallarnerneqarmat illoqarfinni pisartut assigiikannersumik iluseqaleriartorsimapput.

Ullup aallartinnerani erfalasulernerit, ajunaarsimasut eqqaassutissaannik naasortaliinerit kiisalu naalagiaqatigiinnerit ingerlanneqassallutik.

Inuk kulturikkut malunnaatilik kiisalu inuusuttoq maligassiuilluartoq Nanortalimmi nersornaaserneqassapput. Illoqarfiit amerlanersaanni pisut assigalugit ulloq qittannermik naggaserneqassaaq.

Narsami kulturikkut illu pisortatigoortumik ammarneqassaaq. Kulturikkut illu pitsaaliuinermik siunnersortimit katersugaasiviullu pisortaanit ingerlanneqartussaq saqqummersitsiviusartussatut aamma pilersaarutaavoq.

Qaqortumi eqqumiitsulianik takutitsisoqassaaq, kiisalu nunat avannaamioqatigiit nipilersornermik erinarsornermillu aliikkusersuissallutik, ilaatigut Rasmus Lyberth aamma Islandimit operamik erinarsortartoq peqataassalluni. Kiisalu Angakkuartartumik aamma takutitsisoqassaaq.

Rappertartoq Qeqertarsuarmeersoq Peter Lyberth, Paamiuni tusarnaartitsissaaq, qatserisartullu arsaattarfimmi qapummik seqqitsaareerpata arsaannermik unammisoqassalluni.

Nuummi pisussarpassuit ilagaat, unnukkut Inussivimmi kalattuunik rockimillu nipilersorneq, Inge Olsvig Brandtip nipilersortartoqatigiivinit Jørgen Jerimiassenillu ikinngutaanit ingerlanneqartussaq.

Utoqqaat timigissariaasiannik kiisalu atisatoqqanik takutitsinerit Maniitsumi aamma ingerlanneqassapput.

Sisimiuni pisussat ilagaat isiginnaartitsisartut Pakkutat isiginnaartitsinerat kiisalu piginnaanillit sassarnissaminnut periarfissaqassallutik.

Qasigiannguani pilersaarutit ilagaat, Tasersuarmi umiamik kanomillu angalanissaq.

Ilulissani pinngortitalerisoq meeqqanik ujaasisitsilluni unammisitsissaaq, kiisalu kommunemit nersornaasiisoqassalluni.

Uummannami aamma kulturikkut ingerlatsilluarsimasumik nersornaasiisoqassaaq, kiisalu ”Den toppede høne” nipilersorlutillu qitimmik takutitsiussat ilagaat.

Nipilersortuusaarneq, qajartorneq ilaatigullu nutsugiallammassuaq Jørgen Kleemaan Upernavimmi aliikkutarineqartussat ilagaat.

Tasiilami nersornaasiinerit saniatigut asimi uunnaasaasoqassaaq, qitimmillu ulloq naggaserneqassalluni.

Illoqqortoormiuni pisussat ilagaat illumik eqqaannik saligaatsuutitsillaqqissunik akissarsisitsineq.

Sila ajussagaluarpat illoqarfiit amerlanersaasa pisussat timersortarfimmut imaluunniit katersortarfimmut nuunniarpaat.