Inuiattut akuerisaasinnaanerput oqaluuserineqassaaq
Namminersorneq Pillugu Ataatsimoortumik Isumalioqatigiissitap ukioq manna pingajussaannik ataatsimiinnerat Ilulissani marsip 15-ianniit ingerlanneqassaaq. Inuiaat kalaallit nunarsuarmioqatigiit inatsisiliuunneqartarnerat naapertorlugu inuiattut akuerineqarsinnaanerannik apeqquteqaat ataatsimiinnissami ilaatigut sammineqassaaq.
Inuiaat kalaallit inuiattut akuerineqarsinnaappat?
Apeqqut tamanna Namminersorneq pillugu Isumalioqatigiissitap tullissaanik ataatsiminiinnissamini Ilulissani pisussami oqaluuserisussaavaa. Apeqqut tamanna Isumalioqatigiissitap nunanut allanut ministeriaqarfimmut siorna septembarimi apeqquteqaatigaa. Kalaallit inuiattut akuerineqarsinnaanerannik apeqqutigineqartoq nunatta Danmarkillu akornanni pissutsit nutaamik aaqqissuussiffiginissaanni inatsisissap oqaluuserineqarnissaanut tunngavoq.
Tassalu nunanut allanut ministeriaqarfik apeqqummut tamatumunnga akissuteqarpoq. Akissuteqarnermilu inuiaat inatsisitigut inisissisimasarneri misissoqqissaarneqarlutik toqqammavigineqarput. Akissummilu inerneritinneqartoq tassaavoq: Aap inuiaat kalaallit nunarsuarmioqatigiit inatsisiliuunneqartarnerat naapertorlugu inuiattut akuerineqarsinnaapput. Tamannalu nunarput sinnerlugu Folketingimut ilaasortap aappaata Lars-Emil Johansen-ip nuannaarutiginerarpaa Danmarkimi naalakkersuisut sinnerlugit, nunanut allanut ministeri Per Stig Møller taama nalunaaruteqarsinnaammat, torrallaanerarpaa. Namminersorneq Pillugu Isumalioqatigiissitap siulittaasua Kalistat Lund-ip siusinnerusukkut oqaatigereerpaa inuiaat kalaallit inuiattut akuerineqarnissaannik apeqqutip qulaajarneqarnissaa namminersorneq pillugu Isumalioqatigiissitap suliassaasa pingaarnerit aapparigaat.
Namminersorneq pillugu Ataatsimoortumik Isumalioqatigiissitap suliassaasa pingaarnerit appaaraa nunatta Danmarkillu naalagaaffeqatigiinnermi naligiissumik inissisimalernissaat.
