Inuiattut akuerisaaneq, aamma oqaatsitigut
Kalaallit inuiattut akuerineqarnissaat Namminersorneq pillugu ataatsimoortumik isumalioqatigiissitap Ilulissani ataatsimiinerani Danskit nunanut allanut ministereqarfianiit oqaatigineqartoq, nunatta namminersulernissaanut suliniarnermi alloriarfiulluassasoq, ilimagineqarpoq.
Tamanna aamma Kalaallit Danmarkimiittut 10.000-it missaanik amerlassuseqartut iluaqutigilluassagaat, Nikoline Ziemer, Folketingimut qinersisoqarmat Danmarkimi kalaalersatuaalluni qinigassanngortittoq, oqarpoq.
Pingaartumik Kalaallit Danmarkimi najugaqartut kalaallit oqaasiinik ilinniartinneqarnissaannut aqqutissiuussisariaqarnerarpaa.
- Tamanna Kalaallit piumasaqarnerulernerannik kinguneqartariaqarpoq, Kalaallit ilitsoqqussaralugu oqaatsiminnik ilinniartinneqartariaqarput, Nikoline Ziemer, Danmarks Radiop nutaarsiassaqartitsivianeersumit apersorneqarluni oqarpoq.
Nangilluni oqaatsigaa, taamaaliortoqartariaqartoq kulturerput Danmarkimi aamma pigiinnarneqassappat. Kalaallit Danmarkimi najugallit 10.000-it missaaniittut eqqarsaatigalugit Qallunaanit unguneqarsimasutut aamma assersuuneqarsinnaasut, oqaatsillu sakkugalugit immikkuullarissuseq aamma malunnartinniarneqarsinnaasoq, Nikoline Ziemer oqarpoq.
