Inuiattut akuerineqarnissaq oqaluuserineqassaaq

Namminersorneq Pillugu Ataatsimoortumik Isumalioqatigiissitap pingajussaannik ataatsimiinnera ullaap tungaa aallartissaaq. Ilulissani ataatsimiinnermi oqaluuserisassat siullersaraat oqaaseqaat, Isumalioqatigiissitap Danmarkimi Inatsiseqarnermut Ministeriaqarfimmut suliakkiutaa, kalaallit inuiattut akuerineqarsinnaanerannut tunngasoq. Oqaaseqaammilu kalaallit inuiattut akuerineqarnerat erserippoq.

- Nunarsuarmioqatigiit inatsisiliuunneqartarnerat naapertorlugu kalaallit inuiaapput, Isumalioqatigiissitap siulittaasuata tullia, Folketingimilu siulittaasoq Christian Mejdahl oqarpoq.

Kalaallilli inuiattut akuerisaanerat nunamik nunamut tunngusunut oqartussaatitaanertut imaluunniit Naalagaaffiit Peqatigiinnit akuerineqarnertut paasisariaqarnerluni? Apeqqut tamanna Isumalioqatigiissitap qulaajarniartussanngorpaa. Tamatuminnga qulaajaasussamik suleqatigiissitamik pilersitsisoqassasoq, isumalioqatigiissitap siulittaasua Kalistat Lund oqarpoq.

Suleqatigiissitat marluk nalunaarusiaminnik ullumi aamma saqqummiissapput. Suleqatigiissitap aappaa nunamik piginnittussaatitaanermut tunngasunik aappaalu aningaasarsiornermut ukiumoortumillu tapiissutaasartunut tunngasunik suliaqarput.