Inuiaqatigiit ukiuni tullerni suli sipaarallassapput

Nunatta karsiata milliardi koruuninik siorna amigartoorujussuareernermi, ukiuni tullerni sipaarnissamut piareersassaagut. Aningaasaqarnermut naalakkersuisup, Palle Christiansenip, aningaasaqarnikkut ingerlatsinneq pillugu nalunaarut ullumi saqqummiukkamiuk, tamanna erseqqissarpaa.
Allattoq Jens Thorin
marsip 24-at 2010 12:46

Aningaasarnikkut ingerlatsinneq pillugu nalunaarut tassaasarpoq Nunatta aningaasaqarnikkut massakkorpiaq qanoq inneranik nassuiaat.

Nalunaarut nutaartaqarpallaarunanngikkaluarpoq, aningaasarsiornikkummi unammilligassat ilisimaneqarput.

Kisianni aningaasarsiornikkut unikaallassimaneq ernumanarpoq. Ataatsimut tapiissutit iluaqutigalugit nunarsuaq tamakkerlugu aningaasarsiornikkut ajornartooqqaneq nunanut avannarlernut allanut naleqqiulluta anigoriartorluarnerusimagaluaripput, Naalakkersuisut suli sillimaniarput. Ukiuni kingullerni ineriartorluarsimaneq annermik attartornikkut pisimammat ernumanarpoq. Kiisalu aamma nunatta avammut tunisai 2 %-nik ikileriarsimammata ernumanarpoq.

Taamaammat pisortat akiitsunikkiartornerat unikaallatsinneqartariaqarpoq. Tamanna anguneqassaaq, avammut tunisat amerlinerisigut. Tassalu aalisakkat nunanut allanut tunisat amerlisariaqarput, soorluttaaq aamma aatsitassanik piiaanissaq isumalluarfigineqartoq.

Atugarissaarnissamut sullissinermik pitsaanerulersitsinissamut akissaqaleqqulluta aningaasanik aqutsineq sukannernerulissaaq. Ilaatigummi meeqqanut inuusuttunullu isumaginninnikkut pitsanngorsaasoqarniarpoq, aammali amerlanerusut ilinniarnissamut periarfissaqartinniarneqarput inissiallu amerlisarniarneqarlutik.

Taamaammat akileraarutit akitsuutillu allanngortinniarneqarput. Akilerartarneq atugarissaarnerlu pillugit isumalioqatigiissitat suliamik ilaanik maaji saqqummiussissaaq, isumaliutissiissummillu tamakkiisumik 2011-mi februaarimi tunniussissalluni. Suliap taassuma akileraarutit akitsuutillu allanngortinnissaanut periusissat, inussutissarsiutit atugarissaarnerullu ineriartortinnissaannut aqqutissiuisinnaasut, sammissavai.

-Inuussutissarsiutinik suliffinnillu nutaanik, Nunatta Karsianut tapersersuisinnasunik, pilersitsisariaqarpugut, aningaasaqarnermut naalakkersuisoq, Palle Christiansen, oqarpoq.