Inuiaqatigiit pillugit ilisimatooq isumaqatigiissut pillugu: Inuiaqatigiinni sanngiinnerusut ukkatarileraat
- Inuit Ataqatigiit inuiaqatigiinni sanngiinnerusutut inissisimasut ukkatariniarlugit qineqqusaarutigaat. Taannaavorlu isumaqatigiissummi siunnerfiliussimasaanni pingaarnertut inississimasoq.
Naja Carina Steenholdt taama oqarpoq.
Taanna ilisimatusarfimmi Aalborgimiittumi inuaqatigiit pillugit ilisimatuujuvoq. Nunatsinnilu inuunermi atukkat pillugit misissuisuulluni.
AAMMA ATUARUK Isumaqatigiissummit tigulaarineq: Isummersuisit nutaat, inissaaleqisuerunneq Kuannersuarnilu suliniummik taamatitsineq
Partiit marluk, tassa Inuit Ataqatigiit Naleqqallu isumaqatigiissutaat atuaraanni isumaginninnermut tunngasunik annertuunik imaqartoq taassuma atuarsinnaavaa.
Isumaqatigiissut
Isumaqatigiissut nutaaq Nuummi katuami tallimanngormat atsiorneqarpoq.
Tassanilu Naalakkersuisunngortut nutaat saqqummiunneqarput.
Inuit Ataqatigiit siulittaasuat Muté B. Egede Naleraqqamili siulittaasoq Hans Enoksen Inuit Ataqatigiit arfineq pingasunik naalakkersuisuutitaqassasut, Nalerarlu marlunnik naalakkersuisuutitaqassasut isumaqatigiipput.
Naak Atassut naalakkersuisoqatigiilernissamut isumaqatigiinniarnerni peqataangaatsiaraluarluni Naalakkersuisunut ilaalinngilaq. Atassutilli naalakkersuisoqatigiinnut tapersersortaaniarluni aalajangerpaa.
Naalakkersuisussat nutaat inatsisartunit apriilip ulluisa 23-anni tallimanngornermi akuerineqassapput.
Assersuutigalugu meeqqanut inuusuttunut ilaqutariinnullu immikkut naalakkersuisoqarfiliortoqarpoq.
- Nunatsinni meeqqanut, inuusuttunut ilaqutariinnullu immikkut naalakkersuisoqarfeqarnikuunngilaq, taamaattumik isumaqatigiissummi allaqqasut eqquutsinnissaannut tamanna ikaarsaariarnerujussuuvoq.
Angerlarsimaffeqanngitsut ikiorneqassapput
Aamma nunatsinni 2035-mi angerlarsimaffeqanngitsuerunnissaa anguniakkatut allassimavoq.
Naja Carina Steenholdtip ilisimatuutut misissuinerminut atatillugu inuunermi naleqartitat pillugit nunatsinni innuttaasunik apersuilluni angalanikuuvoq.
- Nunatsinni innuttaasut inuunerinneq qanoq paasineraat misissorsimavara. Amerlasuunullu inuunerinneq qanoq ittuunersoq takorlooruminaappoq, angerlarsimaffeqanngitsullu aamma taamannak isumaqarput. Angerlarsimaffeqanngitsorpassuupput, taakkulu inuunerinneq qanoq ittuunersoq takorloorsinnaanngilaat.
Takorluuinermiit piviusunngortitsineq
Ilisimatuup isumaqatigiissummiit siunissami qanoq piviusunngortitsisoqassanersoq malinnaaffigissavaa.
- Kuannersuarni aatsitassarsiornialersaarnerup qanoq unitsinneqavinnissaa piviusunngussanersoq pissangangaara. Nalunarpormi piviusunngussanersoq. Aappaattullu isumaginninnermut tunngasut anguniarneqartut aamma qanoq anguneqassanersut takunissai qilanaaraakka.