Inuiaqatigiit akiliisinniarneqarput
Partiinut aningaasaliissutaasartut qaffanneqarnissaat tallimanngormat unnukkut inatsisartuni eqqartorneqalermata, Demokraatit piumasaqaraluarput, partiinut tapiissutit oqaluuserineqarnissaata kinguartinneqarnissaanik. Tamannali siulittaasoqarfimmit itigiartinneqarpoq.
Itigartitsineq Demokraatinit narrutsassimaarutigineqarpoq, Demokraatillu siulittaasuat Per Berthelsen oqarpoq, inatsisartuni siulittaasoqarfik tamanut atuunnani taamaallaat amerlanerussuteqartunut siulittaasoqarfik atuuttoq.
- Nunatsinni ikinnerussuteqartunut, ingammik partiinut pinnittarnerup equnganerujussua sakkortuumik uparuarpara, tassami Inatsiartuni siulittaasoqarfiup tamanut atuutsinneqannginnera malunnarmat.
- Inuaqatigiinnut pingaaruteqarluinnartoq, tassalu partiinut aningaasaliissutaasartut qaffatsinniarneqarnerat, oqaluuserisassatut kinguartinniarsimagaluarparput. Tassami tupinnaannartumik aammalu kanngunaannartumik ukiup aappaata qiteqqunnerani partiit aningaasaliiffigineqartarnermikkut ilaatigut 130 procentimik qaffaallutik siullermeerinninnerminni aalajangiisitsipput. Aammalu taassuma saniatigut siunnersuut sumilluunniit soqutiginagu, marloqiusamik piffissaq tamaat atorlugu qinikkatut inissisimavinnik tamakkiisumik aningaasarsiaqarnermut tunngassuteqartoq, kusananngitsumik eqqartorneqarluni.
Demokraatit tungaaninngaanniit siunnersuuteqarpugut, partiinut tapiissutit 300.000 koruuninik sipaaruteqarfigineqarnissaannik, uagummi nammineerluta partiitut aningaasanik aqutsilluarnikkut aningaasat pisartakkagut naammagigatsigit, partiilli allat ilaatigut millionit sinnerlugit akiitsoqarlutik. Siornatigut allatseqarnikkut partiinut tapiissutit 1,8 millioni koruuninik ilaneqareernikuupput.
-Taamaattumik partiinut tapiissut qaffatsinniarneqarpoq, partiit ataasiakkaat akiitsutik inuiaqatigiit akiligaannik matussusertinniassagamikkit, Demokraatit siulittaasuat Per Berthelsen, taama oqarpoq.
