"Inuiaqatigiinnut tatiginartumik aamma akikitsumik"
Nunap ataqatigiinnermut attaveqarfiisa inuiaqatigiinni aningaasartuutaanerisa paasiniaqqissaarnissaat siunertaralugu, Naalakkersuisut Assartuussineq pillugu Isumalioqatigiissitaq 2009-mi decembarimi pilersippaat.
- Aningaasaqarneq eqqarsaatigalugu inuiaqatigiit tatiginartumik aamma akikitsumik angallanneqartassapput, isumalioqatigiissitap innersuussutaani ilaatigut taama allassimasoqarpoq.
Assartuineq pillugu isumalioqatigiissitaq ukioq ataaseq sinnerlugu sulereerpoq, sulinerminnilu Qaqortup Ilulissallu akornanni ilaasunik imaatigut angallassineq pillugu ilaatigut nalunaarusiorlutik, misissueqqissaarnermilu paasisaasa ilagaat, sinerissami ilaasunik taamatut angallassinermik ingerlatsineq imminut akilersinnaanngitsoq. Soorluttaaq Qaqortumi mittarfiliornissamik siunnersuut aalassatsitsisimaqaaq.
Isumalioqatigiissitap suut angusimanerai ullumi nalunaaqutaq ulloqeqqanut saqqummiunneqassapput. Isumalioqatigiissitap siulittaasua, Christen Sørensen saqqummiussisuussaaq. Saqqummiussat siullermik tusagassiortunut ilisaritinneqassapput ualimullu innuttaasunut saqqummiunneqassallutik, tamannalu Ilisimatusarfimmi pisussaavoq. Tassanilu innuttaasut oqalliseqataanissaminnut periarfissinneqassapput.