Kuluk Helms Nuuk Nordiskimi: Inuiaqatigiinnit allaneersuutinneqartuuvunga
Kuluk Helms qallunaajullunilu kalaaliuvoq.
Kulturit silarsuillu marluk akornanniinneq ukiuni 32-ini marloqiusami inuuffigisani toqqammavissarsiorpaa.
- Uattulli affarmik affarmillu pinngorfeqartunik ajornartorsiutigisartakkannillu assingusunik aqqusaagaqartartunik ujartuijuarpunga, minnerunngitsumik Kalaallit Nunaata Danmarkillu akornanni noqqoruuffiusinnaasuni, Kuluk oqarpoq.
Kalaaliunissamut qaamavallaarpoq
Kulturit marluk akornanni noqqoruunnerit sammisaralugit sisamanngornerup unnukkuani isiginnaartitsisusiani `Jeg Hører Til - Uannut inissaqarpoq` Nuuk Nordiskimi kisimiilluni isiginnaartitsissutigaa.
- Kulturit marluusut akornanniinnermi aammali arlaannaannulluunniit akuliutivissinnaanngitsutut misigisimasarnermut tunngavoq, Kuluk oqarpoq nangillunilu:
- Neriuutigaaralu isiginnaariat tarrarsorfissaqarlutillu takuneqartutut misigisimassasut.
Isiginnaartitsinermi annoraamernit aappalaartut qaqortullu qilaamit nivinngapput.
Ataasiakkaarlugillu Kuluk Helmsip nusuttarlugit piiarpai
Kalaallinillu qallunaanillu asissuinerit misigisani pigilersimasanilu annoraamernit qilaamit nutsuagai ataasiakkaarlutik tamarmik oqaluttuassartaqarput.
- Uannorpiaq assersuusiarissaguma akutarujussuunera assersuutigisinnaavara, nangillunilu:
Tassaavunga tuluttut taaneqartartoq ´white passing´, ammip qalipaataa najoqqutaralugu inuiaqatigiinnit allaneersuutinneqartarneq. Kalaaliusungalu paasineqaraangat tupaallaatigineqartuaannavippoq.
Uaajeerneq Kuluup timaaneereersimavoq
`Timinni arsamik ikumasoqartuusissaatit´ ilinniartitsisuata East 15 Londonimi isiginnaartitsisartunngorniarfimmiinnerani oqarfigisimavaa.
Ilinniartitsisuata nuannaarutigalugulu tupaallaatigaanillu Kuluk Helmsip timaata aalanera qitinnerilu qisuariaqqaatitut pigireersimavai.
`Suminngaanniinguna piginnaasatit?` ilinniartitsisuata aperisimavaa. Akisinnaasimanngilaali.
Inuunermilu ilaani Italiami isiginnaartitsisartutut atorfinippoq.
Ilitsersuisuatalu Kalaallit Nunaanni uaajeerneq pillugu soqutiginnilluni Kuluk Helmsi apersorpaa. Akisinnaasimarpianngilaali.
Ukiunilu 4000-ini ileqquusimasoq pillugu ilisimasaqarnerulerusulluni Kuluk Helms aalajangerpoq.
Ilisimalikkanilu ilutigalugit imminut aamma ilisisarisimanerulersimavoq.
Ingerlaannarmi qitinneq ilisarivaa.
Isiginnaartitsisunngorniarfimmimi Londonimiinnermini qitinnerup timaanii ikummartitaasut assigai.
- Uangaluunniit suli paasinngikkiga timima uaajeerneq nalunngereerpaa, sisamanngornermi isiginnaartitsinerup naareernerani Kuluk Helms naggasiutigalugu oqarpoq.