Inuiaqatigiinni kiffartuussisussanngortitaasarneq Nunatsinni annikitsuinnarmik atorneqarpoq
Folketingip Kalaallit Nunaat pillugu ataatsimiititaliaanit tamanna pillugu Inatsisinik atortitsinermut ministerimut Morten Bødskovimut apeqquteqaateqartoqarpoq, ministerillu apeqquteqartoq akissuteqarfigiumallugu, Kalaallit Nunaanni Pinerluttunik isumaginnittoqarfiup pisortaanut nassuiaammik noqqaassuteqarsimavoq.
Kalaallit Nunaanni Pinerluttunik isumaginnittoqarfiup pisortaata paasissutissiissutigaa Kalaallit Nunaanni inuiaqatigiinni kiffartuussisarfissanik 64-it missaannik pilersitsisoqarsimasoq, taakkulu ilarpassui inuiaqatigiinni kiffartuussinissamut pineqaatissinneqartunut ataatsimit amerlanerusunik inissaqartitsisut. Tamanna pissutigalugu inuiaqatigiinni kiffartuussisussanngortitaallutik pineqaatissinneqarsimasut 100-t missaat ingerlaavartumik inissaqartinneqarput.
Aaqqissuussinerup januaarip aallaqqaataani 2010-mi eqqunneqarnerata kingorna, suliat Kalaallit Nunaanni Pinerluttunik isumaginnittoqarfimmut eqqartuunneqartup piukkunnassusaanik naliliinertalimmik inuup misissuiffigineqarnissaanik noqqaassuteqarfiusut amerlanersaanni, Kalaallit Nunaanni Pinerluttunik isumaginnittoqarfiup inuiaqatigiinni kiffartuussisussanngortitsisoqarnissaanik innersuussisimavoq.
Inuiaqatigiinnili kiffartuussisussanngortitaallutik pineqaatissinneqartut amerlassusaat qaffakkiartorpoq. 2010-mi marluupput, 2011-mi aqqanillit 2012-imilu decembarip qiteqqunerani 15-iusimallutik. Aaqqissuussineq Danmarkimi eqqunneqarmat aallartinenra ajornakusoorsimavoq. Inuiaqatigiinni kiffartuussineq kingorna annikitsunik pinerluuteqarsimasunut pillaatitut atorneqarneruleriartorsimalluni. Nunatsinni aamma taamatut pisoqartuuppat, nunatsinni pinerluuteqarsimasunut inissiisarfiit tatineqarnerat annikillineqarsinnaagaluarpoq.
