Inuiaqatigiinni akisussaaqataanermut oqallittarfik nutaaq
Nammineq suliffiutillit Kalaallit Nunaannilu oqartussaasut peqatigiilluni sulinerup iluaqutissartaanik atorluaanikkut aaqqiissutissanik nutaanik ataatsimoorussanillu ujarlernissaat siunertaavoq. Tamatumunnga ilutigitillugu inuiaqatigiinnut akisussaanermut tunngasuni pisortat oqartussaasuisa suliassaat pillugit Naalakkersuisunut inassuteqartarnissamik CSR Greenland imminut pisussaaffilerpoq.
Oqaloqatigiittarfimmik pilersitsinermut tunngaviuvoq Kalaallit Nunaanni piujuartitsinermik tunngaveqartumik ineriartortitsinissap qulakkeernissaanik ataatsimoorluta kissaateqarnerput - ineriartortitsineq aningaasarsiornermik, avatangiisinik inunnillu assigiimmik pingaartitsisoq.
Inuiaqatigiinnut akisussaaneq pillugu oqallittarfittaami suliffeqarfiit Naalakkersuisullu peqatigiillutik aaqqiissutissanik nutaanik ujarlissapput.
Soorlu inuusuttut ilitsersuisoqartillugit sulisinnerisigut, suliffinnilu sungiusarfissaqartinnerisigut, sulilersinnissaat, avatangiisitigut ajornartorsiutinut aaqqiissutissanik nutaanik nassaartornikkut, imaluunniit malittarisassanik ersarissunik ersarissumillu aqutsinermik qulakkeerinninnikkut.
Suliffeqarfiit pikkorinnerpaaffitik atorlugit malunnaatilimmik tunniussaqarsinnaanerat aallaavigineqartoq, tusagassiuutinut nalunaarummi ullumi saqqummersumi erserpoq.
Naalakkersuisut oqaloqatiginnittarfimmi sinniisoraat Naalakkersuisoq Maliina Abelsen. CSR Greenlandimiit ataatsimeeqataasassallutik pisortaq Henrik Leth, pisortaq Martin Kviesgaard taavalu CSR Greenland pillugu siunnersuisartoq, Anne Mette Christensen.
