Inuiannik toqoraaneq Canadamiut oqallisigaat

Naggueqatigiit indianerit inuillu meerartaasa qanoq pineqartarsimanerinik sapaatit akunnerata siuliani qulaajaasoqarnerata kingorna, Canadami inuiannik toqoraasoqartarsimanera maanna oqallisigineqalerpoq.
aggustip 02-at 2013 07:28

……Qulaajaanerit sapaatit akunneri marlussuit matuma siorna saqqummiunneqarmata indianerit høvdingii arlallit oqaatigaat taamatut iliortarsimaneq inuiannik toqoraanertut taaneqarsinnaasoq, premierministerilli Harperip oqaaseqartartuata taamaattoqannginnerarpaa. Tamannalu Canadami maanna oqallisigineqalerpoq: Ilumut inuiannik toqoraanerua?

Bernie Farber, Canadami juutit suleqatigiiffianni Canadian Jewish Congressimi pisortaq, nunap inuiisa tv-qarfiannit APTN-imit apersorneqarluni oqarpoq ILUMUT inuiannik toqoraanerusoq.

Bernie Farber oqarpoq Holocausti, tassalu nazistit aaqqissuussamik juutinik nungusaasimanerat eqqaaneqaraangat, inuiannik toqoraanertut taaneqartartoq, ukiulli 100-t ingerlanerini nunap inuiisa kulturiannik, oqaasiinik inooriaasiannillu nungusaanissaq siunertaralugu meeqqat taama ingasatsigisumik pineqartarsimanerat aammalu amerlaqisut pinngitsaalillugit atuarfinnut aallartitaasarsimaneri inuiannik toqoraanertut taaneqartariaqartoq. Aammami atornerlunneqarsimapput, taamatullu pineqarnertik toqqutigalugu, taamaammat inuiannik toqoraanertut oqaatigineqarsinnaavoq.

Ukiut 100-t ingerlanerini meeqqat 75.000-it toqusimanissaat ilimagineqarpoq.

Bernie Farberip inuiannik toqoraanermut FN-ip nassuiaatigisaa isssuaaffigaa, nunap inuiisalu pineqartarsimanerat nassuiaatip tamatuma iluaniippoq.

Apersorneqarnini naggaserlugu oqaatigaa, indianerit inuillu meerartaat pillugit allagaatit isertuussat tamaasa MASSAKKORLUINNAQ saqqummiunneqartariaqartut, qanoq pisoqavissimanera Canadami innuttaasunit paasilluarneqarniassammat.