Inuiaat kalaallit sakkortuumik aalajaatsumillu inuiaassutsimik misigisimapput

Ilisimatusarfimmi Allaffissornermut ilisimatusarfiup misissuinerata nutaap tamanna ersersippaa. Ilisimatusarfimmi ilinniartitsisoq Pia Vedel Ankersen misissuinermik ingerlatsisuusoq ima oqarpoq:

- Paasisakka naapertorlugit kalaallit inuiattut misigisimanerat aalajaatsuuvoq, taamatullu misigisimaneq najoqqutaralugu namminersorneq pillugu isumaqatigiissummut akuersaarusunneq annerulluni, Pia Vedel Ankersen oqarpoq.

Misissuinikkut aamma paasineqarpoq inuiattut misigisimaneq ima sakkortutigisoq, kalaallit akornanni amerlanerussuteqarluartut namminersorneq pillugu isumaqatigiissummit suli annerusumik kissaateqartut.

- Taamatut innuttaasut amerlasuut sakkortuumik inuiaassutsimik misigisimanerisa kinguneranik, aamma misigisimasoqarpoq piffissap sivisuallaanngitsup iluani Kalaallit Nunaat namminersulivikkumaartoq, Pia Vedel Ankersen oqarpoq.

Taamaattorli misissuinermi innuttaasunik tunuliaqutaqarluartumi ersersinneqarpoq amerlanerussuteqarluartut, namminersulivinnissaq aatsaat inuuniarnerup ajorseriannginneranik kinguneqassappat akuersaarumagaat.

- Innuttaasut aperigaangatsigik namminersulivinnissaq kissaatigineraat aamma tamanna inuuniarnerup ajorseriarneranik kinguneqassagaluarpalluunniit, taava ersarissumik akisarput inuuniarneq ajorseriassappat, taava namminersulivinnissaq kissaatiginngikkitsik oqaatigisarpaat. Tassa inuuniarneq ajorseriassappat namminersulivinnissaq innuttaasut kissaatiginngilaat, Pia Vedel Ankersen oqarpoq.

Ilisimatusarfimmi allaffissornermik ilisimatusarfimmi ilinniartitsisoq, Pia Vedel Ankersen misissuinermik ingerlatsisimavoq.