Inuiaat Dorset-ikkut pillugit ilisimasat nutaat

Uumasut, pingaartumik nannut, Inuit Nunatsinnut nunassittartut siulliit qatanngutimissut isigisarpaat. Inuiaat Dorset-it, uagutsitoorlugu Tunit, ilerrinik itsarnisarsiuut qaqutigorsuaannaq nassaartaramik taama inerniliipput.
Allattoq Karsten Sommer, Knud Reimer
oktobarip 15-at 2012 11:55

Danmarkip katersugaasivissuata Tunit kulturiat misissuiffigereerlugu, takornakkaminnik ileqqoqarsimanerat paasiartulerpaat, atuagassiaq videnskab.dk ullumi taama allaaserisaqarpoq.

Canadap avannaani Illulimmi qangarsuaq nunaqarfiusimasumi, killutoqqami nannunik qiperugaaqqanik marlunnik sukumiisumik misissuereerlutik, itsarnisarsiuut Tunit kulturiannik paasisaqarnerulerput.

Qiperugaaqqanik nassaartoq tassaavoq Jørgen Melgaard, taassuma 1960-ikkunni Canadap avannarpiaani Nunatsinnilu nunaqarfitoqqanik assaanermini, inuit uumasullu saarngi akuleriittut aamma nassaarai.
Saanernik akuleriinnik nassaarfiusup, upperisatoqqamut qitiusimanissaa itsarnisarsiuut ilimagilerpaat, tamanna saanernik nassaarfiusoq, inuit uumasullu akunnerminni attaveqaqatigiittarfiattut ilimagineqalerpoq.

Nannunimmi qiperugaaqqat qimerlooraanni Tunersuit nannunik naligisamittut isiginnillutik upperisaqarneri ilimanarsisippaat, tassalu inuit nannutut inunngoqqissinnaasarnerinik upperisaqarsimanerat ilimanarsisillugu.Tunersuimmi ilerrinik sooq nassaassaqanngingajannera taamaalilluni paasineqarsorineqaarpoq. Inuimmi taamanikkornisat saarngi ataasiakkaaginnaat nassaarineqartarmata taakku toqusortatik uullisarsimassagaat uumasunullu neqaat nerukkaatigineqartarsimassasut ilimanarpoq, Martin Appelt, Tunersuit inooriaasiat pillugu misissueqataasoq videnskab.dk-mut taama nassuiaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq