Inuiaat allat oqaasii radiokkut ilinniutigineqartalissapput

Koldingimi somaliamiut radiukkut aallakaatitsivimminniit danskisut ilinniartitsineq misilinnialerpaat. Kommunimi nunanit allaneersut pillugit ataatsimiititaliami siulittaasup, somaliamiunut allassinnaanngitsunut inuiaqatigiinnullu akulerusimanngitsunut radiuaqqanik agguaassinissaq kommunalbestyrelsimi siunnersuutigissamaarpaa.

Somaliamiut arnartaat suliffeqanngitsut eqqarsaatiginerullugit misiliineq ingerlanniarneqarpoq. Siunnersuuteqassamaartoq, Maren Tobi, SF-imeersoq oqarpoq somaliamiut arnartaasa, soorlu nakorsiaraangamik namminneq qallunaatut saaffiginnissinnaalernissaat anguniarneqartoq. Radiokkut ilinniartitsineq kommunimiillu radiuaqqanik agguaaneq Tuluit Nunaanni, Lesterimi isumassarsiaavoq. Tappavani BBC-miit radiukkut tuluit oqaasiinik ilinniartitsisoqarpoq, kommunimiillu somaliamiunut 1.000-inut radiuaqqanik agguaasoqarluni. Susassaqartulli tamarmik iliuuseriniakkamik nuannarinninngillat. Danmarkimi nunanit allaneersunik sullissisoq, Famid Almagid oqarpoq, oqaatsinik ilinniartinniakkat radiuaqqanik tuniorariarlugit neriulluaannartoqarsinnaannginnerarpaa, radiukkullu ilinniartoqarsinnaanera ilimaginngilluinarlugu. Ikiorniakkat, soorlu somaliamiut arnartaat, inuiaqatigiinnut akulerutsikkuminaatsut, taamatut iliuuseqarnikkut suli immikkoornerulersinnaanerat aarleqqutiginerarpaa. Ilinniartitsisoqarlutik kaffisoqatigeerujoorlutik ilinniartinneqartarnissaat orniginerullugu, Famid Almagid oqarpoq.

Koldingimi misiliutiginiarneqartoq kommunip tapersersussaguniuk 15.000 koruunit pallillugit nalilinik radiuararsissapput.