Inu: IT politikerinut allagaqarpoq

aggustip 18-at 2005 11:58

Naalakkersuisut soqutiginnippata aammalu Tele Greenland kisermaassilluni attaveqarnikkut ingerlatsiunnaarpat, internetikkut killeqanngitsumik atuilluni, qaammammut 199 koruuniiginnartoqarsinnaavoq. Inu:IT A/S-mi pisortaq Martin Gjødvad oqarpoq.

Nuummi innuttaasut ulluni makkunani neqeroorfigineqarput qaammammut 199 koruuniiginnarlutik killeqanngitsumik internetikkut attaveqalersinnaasut. Tamannali aatsaat pisinnaavoq, Naalakkersuisut inatsisartunilu ilaasortat piumassuseqarpata, Martin Gjødvad, Inu: IT A/S-mi pisortaasoq oqarpoq nangillunilu:

- Tele Greenland avaqqullugu teknologi nutaaq atorlugu silaannakkut siammarterisalernissamik ineqarnermut attaveqarnermullu pisortaqarfimmut qinnuteqarpugut, taamaasilluta namminerluta qaammataasiamiit nalunaarummik Nuummi aallertalerneq aqqutigalugu siammarterisinnaalerluta, Martin Gjødvad Naalakkersuisunut allakkamini taama allagaqarpoq, nangillunilu: -Ukiuni tulliuttuni tallimani immikkut akuerineqarluta taamatut ingerlatsisinnaanissamik pisortaqarfimmut qinnuteqarpugut. Naalakkersuisut inatsisartunilu ilaasortat qanoq piumassuseqartiginersut maannakkut apeqqutaaginnalerpoq, Martin Gjødvad oqarpoq.

Internet-ikkut akikitsumik killeqanngitsumillu atuisinnaaneq maannakkut allanngussappat, inatsit 1993-mili allanngortinneqarsimanngitsoq allanngortinneqartariaqartoq, Martin Gjødvadip oqaatigaa, taannalu aamma isumaqarpoq pissutsit assigiit aallaavigalugit unammilleqatigiinneq ajoqusiinavianngitsoq.