Internettimik atuineq akikinnerulissaaq
Akinik appaaneq atuisunut 25 miliuunit koruunit missaannik sipaarutaassaaq.
- Atuisutta akiliutigisartakkamik nalingata angeqqataanut internettimik atuisinnaanerulernerat nuannaarutigisorujussuuarput. Atuisut internettimik akikinnermik kissaataat Tele-Postimi ilisimaaraarput, taannalu angujumallugu taamatut neqerooruteqarpugut, Telemi pisortaq Anders Barslund oqarpoq.
Akinik appaaneq oqarasuaatit angallattakkat internettimut attaveqaataannut aamma atuuppoq.
Aamma illoqarfinni imaatigut attaveqaateqarfiusuni Nuummi Qaqortumilu atuisut ataasiakkaat TELE-POST-imit piffissami qaninnermi periarfissanik nutaanik neqeroorfigineqassapput.
Illoqarfiit taakkua immap naqqatigut kaabelimut toqqaannartumik attaveqarnerat taamatut periarfisiisoq Telemit nassuiaatigineqarpoq.