Internettikkut niuerneq unammillerniarpaat
- Inuit aningaasanik Danmarkimut atuinnginnerminni illoqarfimmi pisiassap taassuma akeqataanik peqarnersoq, kiffartuussinerulluunniit assinganik pissarsiassaanersoq misissoqqaartarsinnaavaat, peqatigiiffimmi siulittaasoq Jan Køhler oqarpoq.
Inuit internettikkut pisiniaraangata qanoq annertutigisumik illoqarfimmi pisiniarfiit annaasaqartarnersut, Jan Køhlerip eqqoriarsinnaanngilaa.
Kisianni Tele-Posti Danmarkimiit nunaniillu allaniit poortukkanik ukioq kingullermiit amerlanernik tigusaqarsimavoq.
Soormiuna taava pingaaruteqartoq tamatuma unitsinnissaa?
- Pisiniartup maani nunatsinni akeqqataanik imaluunniit maani kiffartuussinera qaffasinneruppat, soorlu qularnaveeqquteqarneruppat pisiallu naammagittaalliutiginissaa ajornannginneruppat, taava pisiniartumut pitsaanerussaaq tamaani pisiarigaanni Danmarkimut nunanulluunniit allanut uterteqattaarneraniit, Jan Køhler oqarpoq.
Aamma nunatta aningaasaqarneranut iluaqutaassanerarpaa.
- Pisiniarfiit nunatsinniittut aningaasanik iluanaaruteqarnerugunik nunatta karsianut aningaasat nakkartussat amerlanerussapput, Jan Køhler oqarpoq.