Internettersinnaajunnaarnissamut ullut 438-innanngorput
Taamatut nalunaaruteqariataarneq Politikeniminngaanneerpoq, pissuteqarlunilu Internet pillugu naatsorsuutit IANA-meersut naapertorlugit 2011-mi aggustip 19-ianniit IP-adressit pissarsiarineqasinnaajunnaassammata.
Tassa IP-adressinik atuineq ukiuni kingullerni taama ingerlaannassappat.
Pineqartormi tassaavoq Internetimi IP-adressit taamaallaat 4 milliardit kisiisa pigineqalersimammata maannakkullu taamaallaat 6 procentit amiakkuullutik.
IP-adressit sukkanerujartuinnartumik atorneqartalerput iPhone, iPad allalluunniit nutaaliat tamarmik immikkut IP-adresseqartalermatali.
Aaqqiissutissaq nutaaq IP-adressinut nutaanut inissalik piffissaagallartillugu atulinngikkutsigu Interneti amerlavallaartunit atorneqarnermigut ajutuussasoq immikkut ilisimasallit siulittuutigaat.
- Eqqissisimaannaritsi, Kurt Westh Nielsen Prosabladet-imi aaqqissuisuuneq IT-lu pillugu ukiorpassuarni allaaserisaqartartoq oqarpoq.
- Tamanna tassanngaannaq pisinnaassanngilaq. Illillu atuisartutut nammineq iliuuseqarsinnaanngilatit, tassami nalunaarasuartaatileqatigiiffiit Internetimut neqerooruteqartartut taakkuummata qaqugu pisisartunut periaatsimik nutaamik taassuminnga neqerooruteqartussaasut, Kurt Westh Nielsen oqarpoq.
Periaatsimi nutaami adressit 340 sekstillionit missaanniittut inissaqarput. Taakkua assigaat nunarsuup qaavani millimeterini tamani adressit 670 billiardit.
Taakkua siunissami naammakkallassagunarput.
