Internetsimik atuinerulerneq sinneqartoortitsilluarpoq
Immikkoortortaq TELE sinneqartooruteqarnerpaavoq, POST taamaallaat 3,8 millionit koruuninik sinneqartooruteqartoq, sinneqartoorutit ikileriarujussuarlutik, tassa siorna 9,3 millionit koruuniugamik.
TELE-p sinneqartooruteqarnerujussua internetinik atuinerup akikillisaavigineqarneranit isertinneqarput. Tassami akinik appartitsinerup kinguneraa internetimik atuinerup 50 procentinik qaffannera.
Akit appartinneqarnerisigut agguaqatigiissillugu ukiumut 1.700 koruunit sipaarneqarput, ukiumut naatsorsuutit pillugit TELE-POST tusagassiuutinut allappoq.
Mobil internetimik atuineq smart-phones-it assigisaallu atorlugit attaveqartarneq 2011-imi annertuumik qaffariarpoq. Mobil bredbåndimik attaveqarnerup 2011-mi annertusarneqarnera pissutaalluni taakkuninnga atuineq annertusivoq. Mobil bredbåndimik atuisinnaanerup 2010-imi Nuummi aallartinneqarnerata kingorna Ilulissani, Sisimiuni, Aasianni, Maniitsumi, Kangerlussuarmi Qaqortumilu maanna atorneqarsinnaalerpoq.
TELE-POST-ip avammut tunisai 2011-imi katillugit 169 millionit koruuniupput, tamanna tunngaveqarluni nunanit allanit tikeraartut Kalaallit Nunaanniinneranni mobiltelefonip attaveqaataanik aamma mobil internetimik atuinerat pissutaalluni.
Ingerlatseqatigiiffik maajip ulluisa aappaanni ataatsimeersuassaaq.