Internetimi peqquserluttut nunatsinnut appakaapput

Peqquserlunniat emailerpassuarnik nassiussuipput Nets-imeersuusaarlutik nassiussamikkullu kreditkortimut paasissutissat tunniunneqarnissaat piumasarisarpaat. Tassani siunertaasoq tassatuaavoq inuit kontoisa imaarnissaat peqquserlunniut phishingimik taaneqartartoq atorlugu.

Nets tassaavut internet atorlugu akiliisarnerit pillugit sullissisoq suliaasalu ilagaat isumannaallisaaneq. Peqquserlunnialli Netsip logoa assileriarlugu inuit kreditkortii pillugit paasissutissanik pissarsiniaqattaarput.

- Kalaallit Nunaanni aningaaserivinniit attavigineqarpugut sullitaat arlallit emailinik peqquserlunniutinik tigusaqarsimasut. Arlallit aamma sianiinaarneqarlutik kreditkortimut paasissutissat tunniuttoorsimavaat, Netsimi paasissutissiinermik sulialik Søren Winge KNR-mut oqarpoq.

Tamatumali tassa kingunerisimavaa kontomik piginnittut aningaasaataasa peqquserluttunit nuunneqarnerat.

Netsimiit siunnersuutigineqarpoq kreditkortimut paasissutissat taamatut tunniunneqassanngilluinnartut aammalu erseqqissaatigalugu email atorlugu Nets taamatut paasissutissanik pissarsiniarnavianngitsoq.

- Siunnersuutitut tunniussinnaasatta pitsaanersaat tassaavoq emailit taama ittut qisuariarfigineqanngilluinnarnissaat nungusarneqarnissaallu, Søren Winge oqarpoq.

Taassuma oqaatigisinnaannginnerarpaa peqquserluttut nunatsinni kreditkortinik piginnittunit aningaasanik qasseriarlutik tillissimanersut.