Internetimi nittartagaq Wikileaks kalerriivoq
Nittartagaq Wikileaks maani nalunaaqutarput najoqqutaralugu aqagu ullaakkut nalunaarummik "pingaarutilimmik" saqqummiussiniarpoq, taakku tassaassagunarlutik pappilissat Irakimi aamma Afghanistanimi sorsunnernut tunngasut, isertuussassatut naqissusikkat.
Wikileaksimit nalunaarutigineqarpoq, internetikkut attaveqatigiittarfimmi Twitterimi "aqagu ullaap tungaani nalunaaqutaq qulinut Europamut nalunaarut angisooq" saqqummiunneqassasoq.
Tv-qarfimmi Al-Jazeerami oqaatigineqarpoq pappilissat tassaasut, USA-p Irakimik 2003-mi tiguaanerata kingorna, Irakimiut nunaqqatiminnik naalliutsitsisarnerannik USA-p isertuussisimaneranik imallit. Tamatumalu peqatigisaanik Amerikamiut nakkutigisaanni sakkutuujunngitsunik toqoraasoqartarsimasoq, tv-qarfimmit oqaatigineqarpoq.
Wikileaksip Amerikamiut pappialaaterpassui tuusintilikkaat, Irakimi sorsunnermut tunngasut, isertuussassatut naqissusikkat juulimi tamanut saqqummiuppai, maannalu pappilissanik isertuussassatut naqissusikkanik amerlanerusunik saqqummiussinissaa ilimatsaanneqarpoq.
Pappilissat sakkutooqarnermut tunngasut isertuussat suli amerlanerusut Wikileaksimit saqqummiunneqarnerisigut, sakkutuut sakkutuujunngitsullu inuunerisa ulorianartorsiortinneqarnissaat, NATO-mi qullersap Anders Fogh Rasmussenip ullumi siusinnerusukkut mianersoqqussutigereerpaa.
- Tamakkuninnga saqqummiussisoqarneratigut sakkutuut sakkutuujunngitsullu inuunerat ulorianartorsiortinneqassaaq, Fogh Rasmussen Tysklandimi forbundskansleri Angela Merkel peqatigalugu Berlinimi tusagassiortunik katersortitsinermi taama oqarpoq.
