Internetikkut niuerneq siuariartoqaaq
Internetikkut niuerneq Nunatsinni atugaaleraluttuinnarunarpoq. Niuernermik ingerlatsivik KNI taama isumaqarpoq. Suliffeqarfiup taassuma internetikkut pisiniartarfik pisisa.gl siorna pilersippaa, maannamullu niuerfiup nutaarsiassaataanik aalajangersimasumik pisartagallit 3.000-iupput, taakkulu nerisassaanngitsunik soorlu pequtinik, qarasaasiakkut pinnguaatinik oqarasuaatinillu angallattakkanik neqeroorfigineqartarput. Taakkulu Nunatsinni angerlarsimaffiit tamarmiusut 23.000-iusut 14 procenteraat.
Internetikkut pisiniartartut nioqqutissanik 20.000-it sinnilinnik qiniataagaqarsinnaapput, aamma kalaallisut kiffartuunneqarsinnaaneq periarfissaavoq.
Nunarput siunissami ungasippallaanngitsumi nerisassaanngitsunik internetikkut niuernermi siuttunut ilannguteriaannaasoq, KNI pisisa.gl-imi ingerlatsinermut pisortap Ajaaja Bech Jørgensenip oqaatigaa. Soorlu Danmarkimi 16-iniit 89-inut ukiullit 72 procentii ukiumi kingullermi internetikkut pisiniarsimapput.
- Nunarput isorartoqimmat nassiussalerinermilu unammilligassat eqqarsaatigalugit angusaqarfiginerusinnaallugu ilimagaarput. Danmarkimi Naatsorsueqqissaartarfiup kisitsisaatai najoqqutaralugit, Nunatsinni innuttaasunit 57.000-iusunit 34.000-ngajalluinnaat ukiut arlaqanngitsut qaangiuppata internetikkut pisiniartalerumaarput, Ajaaja Bech Jørgensen oqarpoq.
Nerisassaanngitsunik nioqquteqartarneq, soorlu pequtinik, iggavimmi errorsinermilu atortorissaarutinik aamma atortunik innaallagissamoortunik Pilersuisup pisiniarfiini siornamut nioqquteqartoqartaraluarpoq. Internetikulli niuerfeqalerneratigut nioqqutit assigiinngitsut amerlanerujussuit nioqqutissanik pisiniartarfinnit imaluunniit nioqqusiortumit pisisartumut toqqaannartumik nassiunneqartalerput.
- Akit taamaalillutik appasinnerulerput sukkanerusumillu niuertoqarsinnaalerluni, KNI taama nalunaarpoq.
