Internetikkut attaveqarneq 2009-mi sukkanerujussuanngussaaq
Canada, Kalaallit Nunaat Islandilu immap naqqatigut kabeliliinnikkut attavilerneqassapput.
Tele Greenland aamma immap naqqatigut kabeliliortartut nunarsuarmi anginersaat Alcatel-Lucent Submarine Networks immap naqqatigut kabeliliornissamik isumaqatigiissuteqarput, piginneqatigiiffiillu taakku marluk isumaqatigiissut aqagu atsiussavaat.
Immap naqqatigut kabeliliinikkut Kalaallit Nunaata nunarsuullu sinneranut oqarasuaatitigut qarasaasiatigullu attaveqarneq sukkanerusunngortinneqassaaaq.
Immap naqqatigut attaveqalernikkut, qarasaasiakkut attaveqaatit sukkanerulissapput aalajaannerulerlutik akikinnerulerlutillu, Tele Greenland neriorsuivoq, tamanna atuisut amerlinerat ilutigalugu ingerlassaaq, tusagassiuutinut nalunaarummi allassimavoq.
Kalaalit Nunaanni Europami Amerikamiiluunniit illoqarfiit ilaanniikkaluaraanni attaveqaatitigut atuineq assigiinngissuteqarnavianngilaq.
Immap naqqatigut kabeliliineq TELE Greenlandip anguniagaanut ”Kalaallit Nunaat nunarsuup qeqqani"-mik taaguutilimmut tulluarluinnartuuvoq Tele Greenlandip siulersuisuini siullitaasoq Kaj Egede oqarpoq.
Kabeli immap naqqatigut attavilerneqassaaq Islandimi illoqarfimmit Landeyarsarndurimit Qaqortumut Nuummullu, tassanngaaniillu New Foundlandimi illoqarfimmut Miltonimut. Immap naqqatigut kabelimik ikkussineq koruunit 736 millionit missaannik akeqassaaq, 2009-llu aallartisimalernerani atorneqalissalluni.
