Interneti aqqutigalugu nioqquteqarneq annertunerusinnaagaluartoq oqaatigaa
Avataaninngaanneersunilli pisisoqarusunnissaa angorusukkutsigu qanormita iliussaagut? Per Rasmussen ima akivoq:
- Akitsuuserinermik malittarisassat eqqumaffigineqartariaqarput, Kalaallilli Nunaannuinnaq tamanna akornutaaginnanngilaq. Nunani tamani tamanna akornutaasarpoq. Nunammi assigiinngitsut akitsuusiinikkut malittarisassaqarput assigiinngitsunik, Per Rasmussen oqarpoq.
Suliffeqarfiit Kalaallit Nunaanniittut annerit internetikkut nioqquteqarnissamik pilersaarusioqatigiittariaqartut taassuma oqaatigaa.
Nioqqutissat nunatsinnit avammut niuerutigisartakkagut ullumikkut aalisagaanerupput, siunissamili nioqqutissianik allanik – allaat nunani allani sanaartorteriarlugit tuniniagassarsiortoqarsinnaavoq. Nunani allani tamanna takornartaanngilaq.
Suliffeqarfiit, inuilluunniit ataasiakkaat interneti aqqutigalugu avammut nioqquteqarusuttut taamaaliornikkut periarfissinneqarsinnaanissaat, Per Rasmussenip takorloorpaa.
Naak Kalaallit Nunaannut Kalaallit Nunaanniillu assartuineq akisugaluaqisoq akimmiffiusariaqanngitsoq, Per Rasmussenip oqaatigaa:
- Nioqqutissat suliarilluakkat nuannersumilluunniit oqaluttuassartallit tassaapput ullutsinni piumasarineqartut, qularutiginngilluinnarparalu nioqqutissat Kalaallit Nunaanninngaanneersut interneti aqqutigalugu avammut nioqqutigineqarsinnaassasut, eCapacity-p pisortaanera Per Rasmussen oqarpoq.
Internetikkut nioqquteqarnermik siunnersuisartut eCapacity suliffeqarfiit angisuut ilaannik sullissisuuvoq, soorlu SAS, Saxobank, Nykredit aamma G E Money Bank ilaatigut sullinneqaramik.
