Internetertarneq CO2-mik anianerulersitsivoq
Googlemi atuisartut qarasaasiaasa innaallagissamik atuinerat ilisimatusarfissuarmi Harvardimi misissorneqarsimavoq.
-Nittartakkami Googlemi paasissutissanik ujarlernerit tamaasa CO2 aniasoq naatsorsoratsigu paasivarput ujarlertitsineq ataaseq CO2-mik 7 grammimik atuisitsisartoq, fysikeri Aleq Wissner-Gross nutaarsiassaqartitsivimmut BBC-mut oqarpoq.
Ullup unnuallu ataatsip ingerlanerinnaani nunarsuarmit tamarmit 200 millioneriarluni Googlemi apeqquteqartoqartarpoq, CO2-mik 1.400 tonsinik aniatitsinermik kinguneqartarluni.
Ilisimatusarfiit maanna paasiniarsaraat nittartakkanik atuinermi CO2-mik atuinerup qanoq millisarneqarsinnaanera. Ilaasa nittartakkat titartagartarpassuallit ammarnaveersaarnissaat siunnersuutigigaat, ilaasa qarasaasiat innaallagiartorpallaarunnaarseqquaat.
Nunarsuarmi tamarmi qarasaasialerinermi CO2-mik aniatitsineq ima atsigaaq allaat silaannakkut angallassinermi CO2-mik aniatitsinertut atsigilersimalluni.
