Internet Cafe Ilulissani ammarpoq
Takornariat, inuusuttut inuutissarsiutillilluunnit Ilulissanut aqqusaartut najugaqareersulluunniit Kussangajaannguani Internet Cafémut iseriarlutik internet aqqutigalugu isumagisassatit isumagisinnaanngorpaat.
Internet Cafe aqqaneq marlunnik sukkasuunik maskiinaqarpoq, qarasaasiarlu ataaseq atorlugu Wii aliikkutarineqarsinnaalluni.
Internet Café ullaap tungaa qulinut ammarneqarpoq, siunissamili ataatsiniit unnukkut qulit tungaannut ammasassasoq, Tuuta Knudsen oqarpoq.
Hotel Hvide Falkimik piginnittut Tuuta aamma Jakob Knudsen Internet Cafemik ammaasuupput.
Internet Cafémi inersimasunut timmisartuaqqat helikopterillu nammineq aliikkutaralugit katitertakkat taartissamaataalu pisiarineqarsinnaapputtaaq.
Tuuta aamma Jakob Knudsen Nuummi pisiniarfiutigisimasaminni tuniniakkamik sinneri assigiinngitsut Internet Cafémi tuniniarpaat.