Internet atorlugu katsorsaasarniarlutik Sverigimi neqerooruteqarput
Annilaanganermik nikalloqqajaanermillu nappaatilinnut Sverigimi napparsimmavik nunarsuarmi siullersaalluni internet aqqutigalugu katsorsaanissamut neqerooruteqarpoq. Sverigimi aviisi, Dagens Nyheter, taama allaaserisaqarpoq.
Ilisimatusartunit paasineqarsimavoq katsorsaariaaseq aalajangersimasoq, ileqqulersortarnermut tunngassuteqartoq, kognitiv adfærdsterapi-mik taaneqartartoq, annilaanganermik nikalloqqajaanermilluunniit nappaatilinnut iluaqutaasinnaasoq. Taamatulli nappaatillit ikiortikkusullutik nakorsiartariaarullutillu katsorsaasumukartariaarutissapput, tassa qarasaasiap saavanut ingillutik ikiorserneqarsinnaalissagamik.
Steven J. Linton, tarnip pissusaanut tunngassutilinnut Sverigimi Örebromi universitetimi professoriusoq, Sverigimi oqartussaasunut nassuiaateqaqqammerpoq, taakkununnga tunngasunut misissuinini qanoq inerrneqarsimanersoq. Linton isumaqarluinnarpoq qarasaasiaq aqqutigalugu ilumut katsorsaasoqarsinnaasoq.
Ersinermik annilaanganermilluunniit, taakkununngalu assingusunik, nappaatillit, taavalu nikalloqqajaanermik nappaatillit, nakorsianngikkaluarluni, qarasaasiq atorlugu ilumut katsorsarneqarsinnaasut, Linton isumaqarpoq. Tarnilli nakorsaanik oqaloqateqartarneq soorunami ajunnginnerpaavoq.
