International friskole soqutigineqarnerulerpoq
Atuarfik Nuuk international friskole, nuannaarutissaqangaatsiarpoq. Atuarfimmut soqutiginninneq alliartorpoq, aasamullu atualerlaassanut allatsissimasut ilaat pingasut inissaarunneqaramik utaqqisuniittariaqarput, taama oqarpoq atuarfiup pisortaa Merete Edlefsen.
- Nuannaarutigalugu nalunaarutigisinnaavarput, atuarfimmut soqutiginninneq ukioq kingullermut sanilliullugu annerummat, aasamullu atualeqqaartitsinissamut soqutiginninneq annertummat. Atualerlaassat taamaallaat 20-it tigusinnaavagut, allatullu ajornartumik atualerlaassat pingasut utaqqisuniitsittariaqarpagut, Merete Edlefsen oqarpoq nangillunilu: - Atuarfiup ingerlaannarsinnaanera inuit upperinerulersimavaat, aamma maluginiarsimasatta ilagaat angerlarsimaffiit kalaallisut oqaasillit meertartaasa angajoqqaavi atuarfimmut soqutiginninnerulersimanerat. Tassa atuarfimmut allatsittut amerlapput Kalaallit Nunaannut Nuummullu attuumassuteqarluartut, Merete Edlefsen naggasiilluni taama oqarpoq.
Mannakkorpiaq atuarfimmi atuartut 60-iupput aasamullu atuartut nutaat 20-it aallartissallutik. Meeqqamik aturfimmiititaqarneq qaammammut 2800 koruuneqarpoq, akimut ilaavoq, tallimat tungaanut meeqqamik paarsineq.
